Minister-in Infiamna Kûtpui a hawng

Minister K Lalrinliana chuan nimin khan Bairabi khelmualah Bairabi Games & Sports Association buatsaih 'Infiamna Kûtpui' a hawng. Infiamna Kûtpui hi January 12, 2022 thleng neih tur a ni a, infiamna chi hrang 18-ah inel a ni ang.

K Lalrinliana chuan, Infiamna Kûtpui chu Mizo infiamna chawi nunna leh infiamnaa Bairabi ṭhalaite tihhmasawnna a nih ngei a beisei thu sawiin, "Hriselna hi hmasawnna kawng pawimawh tak a nih angin taksa insâwizawi leh infiamna hrang hrang uar a pawimawh," a ti a; sorkar hmalaknaa Bairabi khuaa khelmual hrang hrang siamte chu ṭangkai taka hmang turin kalkhawmte a chah.

Bairabi chu Mizoram luhka pawimawh a nih thu sawiin Minister chuan, "Hripui lèn vanglaia ram páwna Mizo tangkhangte an lo thlen khawm laia Mizo tlawmngaihna nasa taka lan chhuahtir ṭhintu an nih avangin Bairabi mipui hi entawn tlak an ni," a ti a; sorkar leh mipui indàwr tawnna awlsam zawk a awm theih nan Bairabi chu SDO (Civil) ṭhuthmuna siam turin hmalak mek a nih thu a sawi.

Bairabi khaw chhunga tui lakna thawm ṭhat te, ramri tihchangtlun te, Tlawng tui lian vanga harsatna awm ṭhin tihziaawmna turte bawhzui mek a nih thu K Lalrinliana chuan a sawi bawk.