Tui chhia sâwngbàwlna hawng

Lunglei district bawrsap Kulothungan A chuan nimin khan Civil Hospital, Lungleia tui chhia sâwngbàwlna khawl bun thar, Effluent Treatment Plant (ETP) a hawng. Lunglei Civil Hospital hi Mizorama sorkar damdawi-in zinga ETP nei hmasa ber a ni.

ETP hawnna inkhawm hi Lunglei Civil Hospital conference hall-ah neih a ni a, medical superintendent Dr SR Ngurchamliana'n a kaihruai. Lunglei bawrhsap Kulothungan A chuan, ETP chu Lunglei district tana ro hlu leh hriselna lama hmasawnna rahbi thar a nih thu a sawi.

Bawrhsap chuan, hmasawnna daih rei nei turin zirna leh hriselna lamah ṭan lak chhunzawm zel a ṭul thu a sawi a, "Lunglei district tan hospital laboratory hmanruate leh blood donation van-te neih belh thuai a ni dawn a, PHC leh sub-centre-te hmasawnna turin hmalak mek a ni bawk," a ti.

ETP hi Central Warehousing Corporation (CWC) aṭanga corporate social responsibility sum cheng nuai 17.61 sénga siam a ni a; damdawi-ina tui chhiate chu zun-in, êk-in leh thil dang atana hman leh theih turin sawngbawl a ni dawn a, ni tin tui chhia litre 20,000 thleng a sawngbawl thei dawn a ni.