Police leh bank-ten Inremna thuthlung ziak

Nimin khan Mizoram Police leh bank pali - Axis Bank, Bank of Baroda, HDFC leh ICICI Bank-te chuan hlawh lâka hamṭhatna (salary package) chungchangah inremna thuthlung an ziak.

Inremna hi Mizoram Police mi leh sate'n hlawh an lâkna bank aṭanga duhsakna leh hlâwkna hrang hrang an chan theihna tura ruahman a ni a; kum thum atan inremna siam niin, Police Headquarters leh bank remtih tawnna anga pawhsei emaw, tihtawp emaw theih a ni.

Police Headquarters-in inremna a ziahpuite zinga bank eng emaw berah Mizoram police mi leh sate'n hlawh lain, hamṭhatna hrang hrang, accidental death coverage, personal loan, home loan, overdraft policy, child education & marriage benefit, unlimited ATM transaction leh a dangte bank-in ruahmanna an siam ang zelin an hmu thei dawn a ni.

Hetiang inremna ang hi kum 2016 khan Mizoram Police chuan SBI nen an lo ziak tawh a, tun thlengin an la kalpui a ni.