Hàlpuah hàl - sorkar hlawhchhamnaah ngai

Mizoram Pradesh Youth Congress Committee (MPYCC) chuan nimin khan thuchhuah siamin, sorkarin hâlpuah leh hâlmawi a khap chunga December 31, 2022 zanlaia Aizawl leh khawpui ṭhenkhatah nasa taka hâl a ni chu dan leh thupek kenkawhnaa Mizoram sorkar hlawhchhamzia lanna a nih thu an tarlang.

MPYCC chuan, "Mizoram sorkarin hàlpuah leh hàlmawi hàl a khap chunga kum thar 2023 lawmna December 31, 2022 zanlaia Aizawl leh khawpui ṭhenkhatah nasa taka hàl a ni chu dan leh thupek kenkawh kawngah Mizoram sorkar a hlawhchham chianzia lanna pakhat niin kan hria. Hetiang zel a nih chuan a huai huai leh a chak chakte lalna ramah kan chang mai ang tih kan hlau hle," an ti a; a hminga mawiah chauh thupek chhuah tawh lo a, thupek kenkawh kawngah ṭan la turin Mizoram sorkar leh Home Minister an chah.

Sorkarin hâlpuah a khap laia Tourism department-in Facebook, Twitter leh a dangteah halpuah leh halmawi thlalakte an thehdarh si chu mak an tih thu tarlangin MPYCC chuan, "Mizoram sorkar chu kal dan mumal nei lo an nihzia tilangtu a ni. A ṭhenin an khap a, a ṭhenin an lo thehdarh kha Home Minister thupek chhuah Tourism Minister-in engahmah a ngaih lohzia leh MNF party chhungkaw buaizia buichhia laih lohin an inpuang chiang hle," an ti.

Congress ṭhalaite hian Mizoram mipuite kum thar 2023 chibai bûkin duhsakna an hlàn a; sorkar ṭha Mizoramah a awm theih nan tun aṭanga ngaihtuahna séng tur leh MPCC president Lalsawta chungah rinna nghat turin mipui an ngen bawk.