Ráltlân thi ta Sawmkhup ruang la thei lo; Ruang hmuh loh thu police-in an sawi thung

Bangladesh aṭanga Zo hnahthlak ráltlân Mizorama luh tum, BSF sipaite'n an lo dan hnua January 4, Nilaini zana ramhnuaia thi pastor Sawmkhup (70) ruang chu Mizoramah lâk tum ni mah se, lâk luh theih a ni lo. Police report-ah chuan, Sawmkhupa ruang hi lâk tumin an kal a, mahse, a thihna hmunah tu mah hmuh tur an awm lo nia tarlan a ni thung.

Tarlan tawh angin, pastor Sawmkhup hi mi dangte nen Mizoramah luh an tum a, mahse, ramri vengtu BSF-te'n luh an phal loh avangin ramhnuaiah an awm a, ramhnuaiah ni ruk chhung vel ei tur mumal nei loa an awm hnuah January 4, 2023 zan dar 8:20 khan ramhnuaiah a thi a ni.

Pastor Sawmkhupa hi Lunglei district-a a chhungte hnenah lâk a, vûi tum a ni a, a ruang la turin Parva-III aṭangin January 5, Ningani chawhma dar 11 vel khan mi eng emaw zat an kal a, mahse, BSF-te'n lâk an phal loh avangin ramri-ah an lo dang a ni.

Baptist Church pastor Sawmkhupa ruang lâk tumtute hian a thihna hmun leh a ruang awmna an thleng thei lo a; hei vang hian Bangladesh ram chhunga an khua, Chheihkiang lam panpui a nih tak thu, thudawnna chuan Vanglaini palai a hrilh.

Hetih lai hian, police report-ah chuan, pastor Sawmkhupa ruang la turin Parva aṭangin January 5, Ningani chawhma dar 10 velah Lawngtlai DC pisa aiawh, Mizoram police, BSF sipai leh Parva YMA-te an kal a, tlai dar 4 velah Sawmkhupa thihna hmun an thleng a; mahse, ráltlânte leh mitthi ruang hmuh tur a awm lo nia tarlan a ni.

Police report tarlan danin, ruang lâk tumtute hian Kuki-Chin National Army (KNA) mi leh sa silai keng Lalsiamlawm (20), Bangladesh-a Sunsawng khaw mi nia insawi an hmu a; an inhmuhna hmunah chuan pastor Sawmkhupa ruang leh ráltlânte pui tura awm a nih thu a sawi.

An inhmuhna hmun hi 'No man's land' a nih avangin Lalsiamlawm chu BSF leh Mizoram police ten an man lo a; an awmna hmun pangngaia let turin an hrilh thung.