Kum 2022-a kângmei chhuak 128-ah mi 15 an kâng hlum, mi 11 an hliam

Fire & Emergency Services (FES) depart­ment chuan kum 2022 chhung khan Mizoramah kàngmei chhuak report 128 an dawng a; Rs 23,69,08,000 hû thil kàng chhia a awm laiin, kângmei lakah Rs 19,28,23,000 vel hû thil venhim a ni thung a, mi 15 an kâng hlum.

FES director C Lal­zahngoa chuan zawhna chhangin, kum 2022 chhung khan FES-in kângmei chhuak report 128 an dawn thu a sawi a, "Heng zinga 33 chu in kâng a ni a, ram kâng 44 leh lirthei/ electric/distribution, adt. kâng 51 a awm. Kângmei chhuakah hian mitthi 15 leh hliam 11 an awm," a ti.

C Lalzahngoa chuan, nikum chhunga kângmei chhuakin thil a tih chhiat hlut zawng chu Rs 23,69,08,000 vel hûa chhût a nih thu a sawi a; FES-in kângmeiin a tihchhiat tur an venhim hlut zawng chu Rs 19,28,23,000 vel hûa chhût a nih thu a sawi bawk.

Vanglaini zawhna chhangin C Lalzahngoa chuan, FES department tan sorkarin post 222 a siam thu a sawi a, "Tunah hian director aṭanga IV grade thlengin mi 180 kan awm mek a, post ruak 42 a la awm. Indaih lohna phuhrûkna atan department dang aṭanga pawhpèn (attached) mi 26 kan nei a, kan vaiin mi 206 kan awm mek," a ti a; Mizoram pumah fire station 14 a awm thu leh thawktu an indaih loh thu a sawi.

FES-a thawktu zingah kâng ṭhelhtu bika ngaih leading fireman leh fireman 108 an awm a; leading fireman post 20 awmah thawktu mi 19 an awm a, fireman post 104 awmah thawktu mi 89 an awm a ni.

FES Director chuan, ṭhál a nih chhoh ṭan tawh avangin kângmei tichhuak thei lakah fimkhur turin mipui a chah a, "Mi tin an bul hnaia fire station phone number nei vek turin ka ngen a, kângmei chhuahnaah kâng ṭhelhtute pui si loa a síra hmuhnawm ena lo en leh kâng ṭhelhtute tana hnawka awm lo turin ka ngen bawk," a ti.

Kângmei a chhuahin Aizawl tan phone number 101-ah te, rîkrum thil hrang hrangah 112 (ERSS) leh district tin FES phone number-ahte hriattir theih reng a ni.