Khawlian khuain kum 100 tlin an lawm Chief Minister leh Speaker-in an hmanpui

Aizawl district-a Khawlian khua chuan Ningani zan leh nimin khan an khaw kum 100-na, centenary an lawm a, chief minister Zoramthanga leh bialtu MLA Lalrinliana Sailo, Assembly speaker-te'n an hmanpui.

CM Zoramthanga chuan, mei mit loa Khawlian khuain kum 100 a tlin lawmna a hmanpui thei chu lawmawm a tih thu sawiin, "Khawlian din a nih a, pi leh pute hun aṭanga a kal chhoh dan leh khawtlang mi pawimawhte an chawimawi hi a entawn tlak hle a ni," a ti.

Khawlian tlangdung hmasawn­na chu sorkarin a ngai pawimawh nia sawiin Zoramthanga chuan, "Daido leh Vawmkawt inkar kawng siamna tur pawh hmasawnna hna thawh tur ruahman zinga ngaih pawimawhah telin, sorkar laipuia ûm zui a nih hnuin cheng vbc. 31 dah a ni," a ti a; kalkawng siam leh hmasawnna ruhrel hmachhawp eng emaw zat hmar tlangdung tan a awm thu a sawi.

Khawlian Person of the Century atan Raltawnkima (L) thlan a ni a, a fapa hnen­ah Chief Minister-in chawimawina a hlan. Khaw­lian centenary tower sak a hawng nghal bawk.

Speaker Lalrinliana Sailo pawhin thu sawiin, "Khawlian hian history ngaihnawm tak a nei. He lai tlangdung hmasawnna turin sorkarin theihtawp a chhuah a, khaw hmasawnna atan khaw hmun nghaktu leh hmun hrang hranga awmte'n mawh­phurhna an nei vek a ni," a ti.

Centenary lawmna hi Khawlian Centenary Celebration Organising Committe chairman H Lianzela'n a kaihruai a, tlaiah centenary ruai an ṭheh a ni.