KHAWTHLIR
SAY-in thisen pe
Salvation Army Youth, Serchhip Corps-te chuan nimin khan Serchhip District Hospital-ah thisen unit 11 an pe a, petute mipa pakua leh hmeichhia pahnih an ni.
Bangladesh râltlân 45 lut
Nimin khan Bangladesh aṭanga ráltlân mi 45-in Mizoram chhung an lut. Mi 45-te Bangladesh aṭanga an chhuah ruala kal ve chhungkaw pahniha mi pakuate erawh chu tar chak lo leh nau no nen an nih avangin an kal chak ve thei lo a, BSF sipaite'n an lo dang hman a, Mizorama luh phal loin an dang nia thu dawn a ni.
Hunpuiah mi 156 man
Krismas leh kum thar vuakvet - December 20, 2022 leh January 3, 2023 chhung khan Mizoram hmun hrang hrangah police-te'n dan bawhchhia mi 156 an man a, thubuai 169 an ziak lut. Aizawl district-ah dan bawhchhia man mi 93 leh thubuai ziah luh 114 awmin a tam ber a, Hnahthial leh Saitual district-ah tlem berin, dan bawhchhia leh thubuai ziah luh pakhat ve ve a awm a ni.
Thawhhona thuthlung
Land Resources, Soil & Water Conservation (LRSWC) department, North East Small Finance Bank (NESFB) leh Mizoram Rubber Society chuan nimin khan Mizorama ṭhelrêt (rubber) chíngtute leh a kaihhnawih kut hnathawktute chawi kân nan thawhhona thuthlung, memorandum of understanding (MoU) an ziak. Thawhhona thuthlungin a tum ber, kut hnathawktute chawi kân a ni a; Mizorama ṭhelrêt chíngtute'n thar chhuah tam zawk an neih theihna tur leh hlâwk zawka Mizoram páwna an thawn chhuah theih nana hmalakte a huam dawn a ni. MoU-ah hian LRSWC secretary Maria CT Zuali, NESFB zonal manager John Lalawmpuia leh Mizoram Rubber Society president K Hrangzuala ten hming an ziak a ni.
Republic Day
Kolasib district bawrhsap John LT Sanga hoin nimin khan DC conference hall-ah sorkar official, bank leh NGO hrang hrang hruaitute'n Republic Day 2023 lawm dan tur an sawiho a; Project Venga Kolasib Stadium-ah lawmna neih ni se an ti a, mawhphurhna hrang hrang an insem. Republic Day ni hian sawm bikte nen DC Bangla-ah hun hman an rêl bawk.