BF.7 rinhlelhawm Mizoramah la awm lo

Covid-19 hri thar BF.7 kài rinhlelhawm Mizoramah hmuh a la ni lo a; December 13, 2022 aṭangin Mizoramah Covid-19 vei hmuh chhuah a ni tawh lo.

Vanglaini palai zawhna chhangin Covid-19 thupuangtu Dr Pachuau Lalmalsawma chuan, Mizoramah Covid-19 hri thar kai rinhlelh an la awm loh thu a sawi a, "Covid-19 pangngai kai pawh hun eng emaw chen hmuh chhuah a ni tawh lo," a ti.

Dr Pachuau Lalmalsawma chuan, Covid-19 hri thar kai rinhlelh an awm a nih chuan Mizoramah endik theih a nih dawn thu sawiin, "ZMC-ah hri thar an kai leh kai loh finfiah theih a ni," a ti a; endikna bàwlhlo chah mek a nih thu a sawi.

December 29, 2022-a chief secretary Renu Sharma hoa ṭhukhawm chuan, Mizorama Covid-19 dinhmun leh December 27-a district hrang hranga mock drill neih report-te an bawhzui a, chî-âina tur a awm rih loah leh nunphung pangngai pèla kal a ṭulna a awm rih loah an ngai.

Hetih lai hian, India ramah BF.7 a lo luh tawh avang leh a lènna ram aṭanga khualzinte'n khawi state pawh an tlawh theih avangin hripui laka invennate ngai pawimawh turin mipui an chah a ni.

January 5, Ningani khan Mizoramah swab sample pahnih endik niin, Covid-19 vei hmuh chhuah a ni lo. Kumin 2023-ah sample 12 chiah la endik niin, hripui vei hmuh a la ni lo. Mizorama Covid-19 positive hmuh hnuhnun ber chu December 12, 2022 kha a ni a, December 13, 2022 aṭangin hripui vei hmuh a ni tawh lo.

Mizoramah sample 19,92,977 endik tawh niin, Covid-19 positive mi 2,38,964 hmuh a ni tawh a; mi 2,38,238 (99.7%) chu dam taka an chhuah laiin, mi 726 (0.3%) an thi a ni.