Raj Bhavan-a sit-in demonstration-ah tel vek turin Mizo mipui an sáwm

Central YMA chuan, Bangladesh ráltlânte chunga India sorkar leh Border Security Force (BSF) thil tih dan duh loa January 9, 2023-a Raj Bhavan bula sit-in demonstration an huaihawt turah tel vek turin Central YMA chuan Mizo mipui an sáwm.

Tarlan tawh angin, Central YMA chuan Bang­ladesh-a Zo hnahthlakte, an sahimna zawnga Mizorama lut leh luh tumte'n harsatna an tawh avangin lungawi lohna lantir nan January 9, Thawhṭanni chhun dar 12 khian Raj Bhavan hmar lam gate bulah ṭhutkhawm (sit-in demonstration) an huaihawt dawn a ni.

CYMA chuan, "Thih leh dam kára léng kan unaute, mahni himna tur nia ngaia India ram rawn pante'n ramria harsatna an tâwk ṭhin hi a pawi kan ti a, YMA chuan mihringte dikna chanvo hre reng chunga lo dawngsawng turin India sorkar a ngen a ni," an ti a; ráltlânte mamawh - ei leh bàr, mut lumna leh chênna turte ngaihtuahsak turin sorkar laipui an ngen.

Central YMA chuan, sahimna zawnga Mizorama luh tumte zinga mi pastor Sawmkhup, Bangladesh Tribal Baptist Church thihna chuan YMA a ṭhàwn thu tarlangin, "Tun hnuah hetiang hi thleng nawn tawh lo se kan duh tak zet a ni," an ti.