Bangladesh ráltlânte ei leh in leh damdawia ṭanpuina kan pe - BSF DG

Bangladesh aṭanga Zo hnahthlak ráltlân Mizoram chhim lama lutte chungchangah Border Security Force (BSF) director general SL Thousen chuan, ei leh in leh damdawi lama ṭanpuinaah an theih ang ang an pe niin Lok Sabha MP C Lalrosanga a hrilh.

Sorkar thuchhuah tarlan danin, Lok Sabha MP C Lalrosanga hian December 5, Ningani leh nimin khan Bangladesh aṭanga Zo hnahthlak ráltlân Mizorama rawn lutte chungchangah Union Home secretary Ajay Kumar Bhalla leh BSF director general SL Thousen te telephone hmangin a bia a ni.

C Lalrosanga chuan Union Home Secretary hnenah hian, Bangladesh buaina avanga tun hnaia Mizoram chhim tàwp lama Zo hnahthlak Mizorama tlanchhiate lakah zaidawh a, dimdawi taka an laka che tura BSF sipaite hriattir turin a ngen a, "Harsatna tam tak kara ei in leh silhfen pawh nei mumal loa India ram chhunga lo lut a, Mizorama himna rawn zawngtute hi mihring dan pangngai anga enkawl an ngai," a ti.

Union Home Secretary chuan, Bangladesh nena inrìna hrûla thil thlengte chu a hriat thu te, a ṭul anga hmalak zel a nih tur thu leh, thil awm dan an thlithlai zel thu a lo hrilh a ni.

BSF director general SL Thousen pawhin, an mawhphurhna an hlen chhuahnaah mihring dikna leh chanvo humhalh chunga dimdawi taka che turin an mi leh sate an chah niin MP C Lalrosanga a lo hrilh a, "A theih chin chinah ei in leh damdawi lama ṭanpuina kawngah BSF mite'n hma an la a ni," a ti niin sorkar thuchhuah chuan a tarlang.

Lok Sabha MP hian nimin vêk khan Lawngtlai DC leh MDC ṭhenkhat bakah, Parva khawtlang hruaitute telephone hmangin a be bawk a; ramri hrúla thil awm dante enfiah a, ṭha taka vawng turin a chah a ni.