Minister-in Buarpui haw rûnpui a hmanpui

Minister C Lalrinsanga chuan nimin khan Buarpui khuaa Electric Mualah Buarpui khawtlangin Intodelh tih thupui hmanga haw rûnpui an buatsaih a hmanpui a; intodelh turin kawng engkimah taimâk a ṭul thu a sawi.

Buarpui haw rûnpui puala inkhawm hi Organising Committee chairman R Lalruala'n a kaihruai a; C Lalrinsanga chuan, mahni kea ding thei turin ni tin khawsakna leh ei leh bar zawnna bakah, zirnaah taimak lehzual a ṭul thu a sawi.

Minister chuan, Mizoram intodelhna turin agriculture leh horticulture lamah ṭan lâk nasat a ṭul thu a sawi a, "Kut hnathawktute dinhmun tihmasawn turin sorkarin theihtawp a chhuah mek zel a ni," a ti.

Buarpui khaw dáia Tlawng lui bul, Chawmphai link road (km. 7) chu laih tura ruahman mek a nih thu te, zirna tihhmasawn nan sorkar laipui PMJVK scheme hmangin Bungtlang aṭanga Vanhne thleng sikul sak ṭhat ngaite sa ṭha tura ruahman mek a nih thu te, Buarpuiah Eklavya School din tura ruahmanna chu kalpui zui mek a nih thute a sawi bawk.

Inkhawmah hian Buarpui khaw mi huaisen lawmman (national award) dawngtu pahnih - Zadingi leh Ramngaihsanga (L)-te hnenah chawimawina thuchei hlan a ni a; kum 2022-a buh thar tamte hnenah lawmpuina hlan a ni.