Hma lam pana kal turin chah

Animal Husbandry & Veterinary (AH&Vety) minister Lalrinawma chuan nimin khan Khatlaa AH&Vety Directorate a tlawh a, thawktute nen inkâwmin, hma lam pana kal zel turin a chah.

Lalrinawma chuan, AH&Vety department chu mipui tana nasa taka thawk ṭhin leh mipui ni tin khawsakna nena inkawp tlat a nih thu a sawi a, "Mipuite'n an chhawr ṭangkai zel theih nan tun aia nasa zawka thawk thei tura inbuatsaih a pawimawh. Mawhphurhna sang tak nei department kan nih avangin mipui pawhin keimahniah beiseina sang tak an nei. Hmachhawp kan neihte department-in hma a sawn theih nan taima taka thawhho leh sawiho zel a pawimawh a ni," a ti.

District hrang hranga AH&Vety department ramte chu mumal zawka chhinchhiah leh enkawl a, ruahmanna ṭha zawk neih a pawimawh thu Minister chuan a sawi bawk.

AH&Vety Minister hian AH&Vety directorate-a OPD, laboratory, x-ray room leh engineer room-te a fang a; AH&Vety Development Board vice chairman Lalmuanpuia, MLA-in a ṭawiawm a ni.