Minister-in TCZP Assembly a hmanpui

Tuichangral Zirlai Pawl (TCZP) chuan nimin khan Bâwktlang community hall-ah General Assembly vawi 10-na an hmang a, minister R Lalzirliana'n a hmanpui.

R Lalzirliana chuan, hun rei tak inkhàrkhip leh ramri buai avangin harsatna hrang hrang a thlen thu sawiin, "Hmànlai ata vawiin thlengin unau indâwm tawn a, mi harsate inngaihtuah tawn dial dial ṭhin kan nihzia a lang nasa hle. Kan hnam hi inngaihsak tawn ṭhin lo ila chu mi tam tak tan mualpho leh mei alh en ngawt maite pawh hmabak palh theih a ni," a ti a; TCZP thupui 'Sem sem dam dam, ei bil thi thi' tih chu ṭha a tih thu a sawi.

Khawvelah thiamna ṭangkai leh hman tlak neih a pawimawh thu sawiin Minister chuan, "Sorkar hnain min daih vek loh avangin eizawnna kawng dang atana thiamna leh theihna kan dap a ṭul. Vawiina harsa taka in beih a, in thawh fat fatna hian in hma lamah rah duhawm tak a chhuah dawn tih hriain, a hrehawmin a harsa deuh a nih pawhin in bei sauh sauh dawn nia," a ti.

Minister hian TCZP hnenah portable ampli-speaker a pe a, Bâwktlang Branch YMA hnenah Mizo hnam incheina set khat a pe bawk.

TCZP Assembly-ah hian nikum chhunga an member thi mi paruk sûnna hun hman a ni a, tun hnaia national award pathum dawngtu Léng khua hnenah chawimawina hlan a ni.

Tuichangral Zirlai Pawl hi kum 2003-ah din a ni a, Tuichangrala khua 14 an tel. Inkhawmpui thupui chu 'Zirlaite leh nationalism' tih a ni.