Bangladesh ramria BSF chêt dan an dem

Bangladesh Refugee Relief Committee Mizoram (BRRCM) chuan thuchhuah siamin, Bangladesh rama Mizote, sahimna zawnga Mizorama luh tumte Border Security Force (BSF)-te'n an lo dang leh an hnawt kîr ṭhin chu pawi an tih thu leh an dem thu an tarlang.

BRRCM chuan, Bangladesh ram chhunga Mizote chenna Chittagong Hill Tracts humhim tura hma latu Kuki-Chin National Front (KNF) hmalakna avangin Bangladesh sipaiin an nawr a, chuvang chuan Bangladesh-a Mizo eng emaw zat chu sahimna zawngin Mizoramah an lut tih an tarlang a, "Inhumhimna tura an kalkawngah harsatna tam tak tâwkin, ramri-ah BSF-te'n kan jerusalem Mizoramah luh phal loin an dang a, an hnawt kîr hi pawi kan ti hle. Mizoram chhung km. 30 vel an luh tawh hnuah BSF-te hian kan unaute hi an pushback ṭhin a ni," an ti.

Nimina BRRCM tarlan danin, Bangladesh aṭanga rawn lutte BSF-in an hnawh kîr hnuhnun berte chu mi 162 an ni a, an zingah kawng laka nau hringte pawh an awm. Bangladesh-a Baptist Church pastor Sawmkhup (70) chu ni ruk chhung chaw mumal ei loa a awm tawh avangin January 4, Nilaini zan dar 8:20 khan ramhnuaiah a thi a ni.

BRRCM hruaitute'n December 27-30, 2022 chhung khan Bangladesh-a Zo hnahthlak, Mizorama ráltlânte an tlawh kual a; Parva-III, Vaṭhuampui, Chamdur-P, Mautlang leh Hmawngbu khuaa awm ráltlânte hnenah ṭanpuina - blanket, thawmhnaw, buhfai, bucket, thleng, belthleng, chawhtawlh, no, chempui, hreipui, pipe leh damdawi ṭhahnem tak an pe a ni.

Ráltlânte an ṭanpui theihna tura puitu - Central YMA, MSU, Vaurawng Zuunthil Vaan Ralvennak, Kuki Welfare Committee leh mi inphalte chungah an lawm hle tih sawiin BRRCM chuan, Mizoram sorkar, Mizo mipui, Zo fa hmun hrang hranga chengte leh pawl hrang hrang, ṭanpui kan ngaihna apianga min ṭanpuinaah Pathian hmingin lawmthu an sawi a; Bangladesh aṭanga ráltlânte'n ṭanpui an la mamawh zel dawn thu an sawi bawk.