Smuggler rorelna kan ni ta ber, Police kuhva rah man theih loh mipuiin an man thei - CLP Leader Zodintluanga

Congress Legislature Party (CLP) leader Zodintluanga Ralte, MPCC treasurer ni bawk chuan, Mizoram hruaitute'n tuna ram an hruai anga an kal zel a nih chuan Mizoram hmabak a thim tak zet niin a sawi a; Mizoram chu smuggler-te rorelna a ang ta ber tih sawiin Assam state-in 'wanted' tia man an tum chu Mizorama Minister inah zalen taka chaw a ei thu a sawi a, Mizoram Police-te kuhva rah man theih loh mipuiin an man fo thu a sawi.

Zodintluanga Ralte hian nimin khan thuchah tichhuakin, Mizoramah dan leh thupek kengkawhtu an awm ta lo emaw tih hial tur a nih thu sawiin, "Mipuite'n kan police-te an ring zo tawh lo a ni ber. Kan police-te hi an ṭha em em a, mahse, an chunga thuneitute an ṭhat miau loh avangin an ṭhatna a lang chhuak thei lo a ni. Kan police-te'n kuhva rah an man hleih theih loh laiin, mipui duty-te chuan ṭum eng emaw zat an man tawh," a ti a; dan leh thupek kenkawh ṭhat lohna chuan ram mipui zingah inphìlna leh thil chhe zawk a hrin a hlauhthawnawm thu a sawi.

CLP Leader chuan, Abub Majum­dar chungchang sawiin, "Assam media-te chuan 'wanted' ti hialin an chhuah a, smuggling lamah a inrawlh nasat avangin Assam police-te'n an man a, bail-a a chhuah laiin Mizoramah zalên takin a rawn awm a, kan minis­ter inah ngampa takin chaw a ei hial a ni. Kan CM pawhin Assam CM nena zanriah an kîl dunna­ah a hruai a nih kha," a ti.

Zodintluanga Ralte sawi danin, dan loa thil tawlh rûk (smuggling)-a Abub Majumdar-a pú ti hiala sawi Musa Ahmed Siddiqui chuan Mizoramah vote a nei a; amah chu Mizoram hruaitu lawk tak fanu nena sawi zawm hlawh a ni.

Mizoramah dan loa thil tawlh rute an zalên a, an ngampa ta hle tih sawiin Zodintluanga chuan, "Kan sorkar hrawn mek hi kan hrawn nawn leh a nih chuan tun hmaa South America rama smuggler-te rorelna ram ang kha kan ni lo ang tih sawi theih a ni ta lo. Tunah pawh kan ni ṭan ta ni berin a lang," a ti.

CLP Leader chuan, sum leh paiah Mizoramin harsatna a tâwk mek tih sawiin, "Hetiang ringawta kan kal a nih chuan kan ram hmabak a thim tak zet. Sum leh paiah mipui kan harsa em em a, kan ram sum leh pai dinhmunin chhiat lam a pan zel. Chutih laiin, kan ram hotupa ber Chief Minister leh a duhsak zawng tlémtê bank account erawh a pung thúr thúr niin a lang," a ti.

"Sorkar hnathawkin a hunah hlawh an la thei tawh lo a, mi harsa zawkte innghahna healthcare lah a kuma kum bill a táng zel bawk si. Sorkar hnathawk hlawh lâk leh sum pûk a inzawm chho ta a ni ber. Mizoram sorkarin sum a pûkna hlawm lian ber Open Market Borrowing (OMB) hmanga sum kan pûk zat a pung chho ur ur a ni ber," a ti a; OMB hmangin kum 2015-16 ah cheng vbc. 200, kum 2016-17 ah vbc. 170, kum 2017-18 ah vbc. 424 pûk a ni a, kum 2018-19 ah pûk a ni lo tih a tarlang.

Zodintluanga chuan, MNF-in sorkarna an chang chiah a, OMB hmangin kum 2019-20 ah cheng vbc. 900, kum 2020-21 ah vbc. 944, kum 2021-22 ah vbc. 747 leh kum kal mekah thla 9 chhungin vbc. 840 pûk a nih thu a sawi a, "CM ni mekin an sorkar hmasak ṭuma kum 5 chhung chu inchibai nan kan hmang a tih ang deuhin, sorkar leh tur chuan kum 5 chhung chu leiba rulhna atan hman a ṭul dawn a ni," a ti.

Sum neih ang angte chu Kamrul-a leh CM tupa Zoramchhana'n an ei ral zel nia a lan thu sawiin CLP Leader chuan, "Anni pahnih hnen aṭang hian CM hian engzat tak chang ang maw? Minister zingah a fa chuam Pu Robert Romawia a mawm tual tual a, mi dang an ro tual tual thung," a ti a; state dangin PMJVK-ah hriselna leh zirna an ngaih pawimawh laiin, Mizoramah chuan infiamna atan ringawt hman a nih thu a sawi.

Tuna Mizoram dinhmunah MNF party mi leh sate pawh an lungawi lo nia sawiin Zodintluanga chuan, "Beisei an la neih vang chauhin an tilang ngam lo. Kumin inthlanah kan ram siamṭha turin an hotupa ber an duh loh avangin Congress an vote dawn tih kan chiang a, MNF aṭanga chhuak kher lo, an hotupa ber duh loh vanga vote tawh lo tur a sàng tél an awm a ni," a ti.

Zodintluanga Ralte chuan, Mizo­ramin hruaitu ṭha, sum enkawl thiam a mamawh­na tak zet tih sawiin, "Enchhin ngai loa mi dik, mi ṭha, sum enkawl thiam tih kan hriat chian sa Pu Lalsawta kaihhruai sorkar kan neih a hun tak zet a ni," a ti bawk.