MSHCS-a inziah luh hun hawng hnai, September 2021 bill la pe chhuak kim lo
Mizoram State Health Care Society (MSHCS) chuan kum khat chhung atana inziah luh (registration) theihna hun an hawng leh dawn hnai. Hetih lai hian, damlote medical reimbursement bill lut tawh, September 2021 leh a hma lama mite hnenah an pe chhuak tawh a, September 2021-a lutte an la pe chhuak kim lo thung.
Tuna MSHCS-a inziak lut mekte inziah luh hun chhung chu March 2023-ah a tàwp dawn a; hei vang hian MSHCS chuan inziak lut duhte tan hun a hawng leh dawn hnai a, buaipui ngaite an buaipui mek a ni. Registration thar chu kum khat chhung, April 2023 - March 2024 atan a ni ang.
Vanglaini thu dawn danin, MSHCS hian September 2021 thlenga an hnena MR bill lut chin an pek chhuah kim loh chu a tam lutuk tawh lo a; Finance department aṭanga sum an dawn leh hunah kum 2020-21 chhunga bill thehluhte chu pek kim theih tawh an inbeisei.
Tun dinhmunah health care bill bá cheng vbc. 70 vel a awm mek a; September 2021 hnu lam, thla 16 vel chhunga bill thehluhte chu la pek loh vek a ni.
Mizoram sorkar chuan nikum khan health care bill ba rulhna atan MSHCS-ah cheng nuai 400 a pe a; October 7, 2022 khan Mizoram sorkar chuan health care bill báte pek a nih theih nan SEDP aṭangin cheng nuai 2,000 pek a nih dawn thu a puang.