YMA huaihawtin Raj Bhavan bulah vawiinah lungawi lohna lantir dawn

Central YMA chuan, Bangladesh ráltlânte chunga India sorkar leh Border Security Force (BSF) thil tih dan duh loin vawiin hian chhun dar 12 aṭangin Raj Bhavan hmar lam gate bulah lungawi loh lantirna, sit-in demonstration an huaihawt dawn a, tel vek turin Mizo mipui an sáwm.

Ruahman dan chuan, sit-in dermonstration hi CYMA vice president Lalhmachhuana'n a kaihruai dawn a, CYMA president R Lalngheta bakah, zirlai pawl aiawhte'n thu an sawi ang. Bangladesh aṭanga sahimna zawnga Mizorama luh tum, BSF-in an lo dan hnua ramhnuaia thi ta pastor Sawmkhup sûnna hun hman a ni ang a, CYMA Zaipawl leh zaithiam dangte an zai bawk ang.

Central YMA chuan sit-in demonstration-ah hian Mizo mipui tel vek tura an sàwm avangin mi ṭhahnem tak an punkhawm rin a ni.

CYMA chuan thuchhuah a siamah, "Thih leh dam kára léng kan unaute, mahni himna tur nia ngaia India ram rawn pante'n ramria harsatna an tâwk ṭhin hi a pawi kan ti a, YMA chuan mihringte dikna chanvo hre reng chunga lo dawngsawng turin India sorkar a ngen a ni," an ti a; ráltlânte mamawh - ei leh bàr, mut lumna leh chênna turte ngaihtuahsak turin sorkar laipui an ngen.

Central YMA chuan, sahimna zawnga Mizorama luh tumte zinga mi pastor Sawmkhup, Bangladesh Tribal Baptist Church thihna chuan YMA a ṭhàwng thu tarlangin, "Tun hnuah hetiang hi thleng nawn tawh lo se kan duh tak zet a ni," an ti.