KHAWTHLIR

Pisa hawng dawn
Mizorama political party hrang hrangte chuan kumin atan vawiin aṭangin an party pisate an hawng dawn. Pisa hawn pual hian an party chhung inkhawm an buatsaih dawn a, an party zawm thar lawm luhna hun an hmang nghal dawn hlawm a ni.

Thisen pe
KṬP, Dinthar Vengthlang Branch chuan January 7, Inrinni khan Synod Hospital tan thisen unit 37 an pe a, petute mipa 24 leh hmeichhia 13 an ni. Inrinni vêk khan Champhai Bethel Branch YMA pawhin an branch kum 40-na lawmna pualin Champhai District Hospital tan thisen unit 55 an pe a, petute mipa 52 leh hmeichhia pathum an ni.

Member-ah ruat
Mizoram University Mizo department-a associate professor Dr Zoramdinthara chu sorkar laipuia Ministry of Culture hnuaia Sahitya Akademi (National Academy of Letters) General Council member atan ruat a ni. Mizo Academy of Letters-a general secretary ni bawk Dr Zoramdinthara hi Sahitya Akademi-ah hian kum 2023 aṭanga 2027 thleng General Council member a ni ang.

MLA-in chhuat phah hawng
Mamit bialtu MLA H Lalzirliana chuan January 7, Inrinni khan a bial chhunga Rawpuichhip community hall-ah badminton court-a chhuat (mat) phah thar a hawng. MLA chuan, "Mamit district-ah kan la hmuh phâk ngai loh thil ropui tak tak kan nei thar nasa a, sorkar leh mipui kan ṭanrualna vang a ni," a ti.

Khehpuam man
Mizoram Police leh an thawhpuite chuan January 6, 2023 khan Vairengte Kawngthar Vengah truck pakhat aṭangin pseudoephedrine kg. 194 an man a; lirthei khalhtu Lalhruaitluanga (37), Ramhlun South leh a thurualpui Lalrodawngliana (33), Hnahlan, tuna Republic Vengthlanga khawsa mek nia inchhálte an man bawk.

LPG connection
3,35,716 a awm
Mizoramah eirawngbawlna gas connection 3,35,716 a awm mek. Gas-ah hian National Corporation of India-in consumer-te hnenah direct benefit transfer hmangin subsidy pawisa an thun ṭhin a; bank account-a gas subsidy thun hi Mizoramah April 1, 2015 aṭangin kalpui ṭan niin, consumer pakhatin kum khatah subsidy ṭum 12 a dawng thei
a ni.