Chief Minister hi zui nuam tak a ni - Dr Vanlalṭanpuia

Lunglei North Bialtu MLA Dr Vanlalṭanpuia chuan January 7, Inrinni khan a bial chhung khaw hrang hrang a fang a, chief minister Zoramthanga chu zui nuam tak a nih thu a sawi.

Dr Vanlalṭanpuia chuan Chief Minister chu sawisel bo a ni bik lo tih sawiin, "Mah se, zui nuam tak, ram leh hnam, kan sakhua humhim zel nana ideology nghet tak nei a ni a, Pathian bel ruat bik a ni. Amah zuitute hian a rual a kal dan kan zir thiam tlat chuan kumin inthlanpuiah hian MNF hian hnehna kan chang leh ngei ngei ang," a ti.

Sorkar sawiseltu awm ṭhin hian hlutna a nei nia sawiin Dr Vanlalṭanpuia chuan, "A luang hniam a piang hian fintu a ngah angin opposition an ṭhat hian sorkar a balance a, sorkar kal fawr tur kha a khalh ngil phah thei. Opposition an that loh hian nghawng ṭha lo a awm ve thei," a ti a, opposition pawhin sorkar khalh ngil turin theihtawp chhuah hi an mawhphurhna a ni tih hi an hriat a pawimawh thu a sawi.