Hunpui laiin police-in mi 156 an man; Hàlpuah kaihhnawihah mi 46 man an ni

Kum 2022 Krismas leh 2023 kum thar hunpui lai, December 20, 2022 leh January 3, 2023 inkarah Mizoram pumah dan bawhchhiatna hrang hrangah mi 156 man an ni a, chu'ng zinga mi 46 chu hâlpuah/hâlmawi kaihhnawiha man niin, hâlpuah/hâlmawi man zawng zawng chu Rs 5,71,043 hù a tling.

Police thuchhuah tarlan danin, hunpui liam ta, December 20, 2022 aṭanga January 3, 2023, ni 15 chhungin Mizoram pumah pawi khawihna leh dan bawhchhiatnaah thubuai 169 ziah luh a ni a, mi 156 man an ni. Thubuai 169 ziah luh zinga 40 chu hâlpuah/hâlmawi kawl leh hâl thubuai a ni a, mi 156 man zinga mi 46 chu hâlpuah/hâlmawi kawl leh hal vanga man an ni.

Hàlpuah/hàlmawi kaihhnawiha man mi 46 zinga mi 25 chu hâlpuah/hàlmawi kawl leh zawrh vanga man niin, mi 21 chu hàl vanga man an ni a; hàlpuah kaihhnawiha thubuai ziah luh 40 zinga 21 chu kawl leh zawrh thubuai niin, mi 19 chu hàl thubuai a ni thung.

Hâlpuah/hâlmawi kaihhnawiha man leh thubuai ziah luh hi Aizawl district-ah a tam ber a; kawl leh zawrh vangin mi 20 man niin, thubuai 18 ziah luh a ni a, hàl vangin mi 18 man niin, thubuai 10 ziah luh a ni. Aizawl district-a hàlpuah/hàlmawi mante hlutna chu Rs 3,59,288 a ni.

Hetih lai hian, Kolasib, Serchhip, Lawngtlai, Mamit, Saitual leh Khawzawl district-ahte hâlpuah/hâlmawi vanga man leh thubuai ziah luh a awm lo.

Kum 2020-21 leh kum 2021-22 hunpuiah khan Aizawl leh Lunglei district-ah chuan hâlpuah/hâlmawi kaihhnawiha man leh thubuai ziah luh a awm vek a; chutih laiin, Siaha, Champhai, Kolasib, Serchhip, Lawngtlai, Mamit, Saitual leh Khawzawl district-ahte hàlpuah vanga man an awm lo thung.

Mizoram Police chuan thuchhuah siamin, boruak muanawm tak hnuaiah Krismas leh kum thar hman a ni a, thil duhawm lo lian tham a thleng lo tih an tarlang a; mipuiin rálmuang taka hunpui an hman theihna tura theihtawpa mahni hna ṭheuh hlen chhuaktu police mi leh sa zawng zawng an chhuan thu sawiin, "Theihtawpa police-te min thláwp a, thâ leh zung séngtu tlawmngai páwlte leh Mizoram mipui chungah lawmthu kan sawi a, min ṭanpuina leh thawhpuina kan ngaihlu tak zet a ni," an ti.

Police thuchhuah chuan, "Sualna tinréng donaah theihtawp kan chhuah chhunzawm zel dawn a, mipui leh tlawmngai pawlte ṭanpuina leh thawhpuina kan ngaihluin kan mamawh chhunzawm zel dawn a ni," an ti a; Mizoram mipuite kum thar atan duhsakna an hlân bawk.