Bangladesh ráltlânte thlavang hauhin Mizoramah punkhawm huaihawt a ni; "Kan unaute lo nawr lettute'n kan rilru an tiná" - CYMA President

Bangladesh-a Zo hnahthlak ráltlânte laka India sorkar leh Border Security Force (BSF) thil tih dan duh lohna lantir nan leh ráltlânte thlavâng hauh nan nimin khan Mizoramah punkawm huaihawt a ni a, mi tam tak an tel. CYMA President chuan, "Kan unaute lo dang kîr a, lo nawr lettute hian kan rilru an tiná a, Mizo mipuite'n kan dem a ni," a ti.

Aizawlah chuan punkawm hi Central YMA-in Raj Bhavan bulah an huaihawt a, CYMA vice president Lalhmachhuana'n a kaihruai. CYMA president R Lalngheta, MZP president Lalnunmawia Pautu leh MSU president Samuel Zothanpuia ten thu an sawi. Ráltlân zinga Mizoram luh theih loh hnua ramhnuaia thi pastor Sawmkhup sûnna hun hman a ni a; resolution an siam bakah, Ministry of Home Affairs-a thleng turin Governor hnenah CYMA-in lehkha an thehlut bawk.

CYMA President chuan, Mizoram ramria duty turin sorkar laipui Home minister Amit Shah-a'n BSF Mizo battalion din a tiam tawh thu sawiin, "Hmana Home minister Amit Shah a lo kal khan din min tiam a, hnam dangte ni loa Mizo ngei hmangaihtute ramria an duty ve theih nan BSF Mizo battalion din mawlh rawh se," a ti.

Mizorama inhrosa mai loa a taka chêt chhuah a ṭul tawh thu sawiin R Lalngheta chuan, "Kan ram hruaitute tha thawh tawhna a ropui ka ti a, amaherawhchu, beisei che u kan la nei. Opposition MLA emaw, ruling MLA emaw, kan ram leh hnam aiawha ding in ni a, kan hnampuite mangangin an awm a, in office nuam tak aiin Parva khua thleng hrâm teh u, vawi khat tal kan MLA rualte'n va tlawh teh u," a ti a; Zo hnahthlakte thlavâng hauh turin ṭanrual a pawimawh thu leh engti zawng pawha Mizorama an luh theih dan tur ngaihtuah a ngaih thu a sawi.

CYMA President chuan, sorkar laipui a ngéng lui tlat tih sawiin, dàn hrúl hretah pawh Zo hnahthlak vâkvaite chhan nan pên chhuah a ṭul theih thu a sawi a, "Thlamuanna zawngin Mizoram, an inpui an rawn panna kawngah BSF mai ni lo, BSF-te dan kîr tura lo hék ṭhintute hi kan hria a, an sim loh chuan Mizo mipui kan che phei ang tih hi ka ring tlat a ni," a ti.

Raj Bhavan bula punkhawm hi chhun dar 12-ah ṭan a ni a, chawhnu dar 1:30 velah an ṭîn darh. Punkhawmah hian mi ṭhahnem tak an tel a, minister leh MLA pawh eng emaw zat an tel a ni.

Bangladesh-a Zo hnahthlak ráltlânte laka India sorkar leh BSF chet dan duh lohna lantir nan leh ráltlânte thlavâng hauh nan Mizorama district khawpui ṭhenkhatah leh Parva-III community hall-ah pawh punkhawm huaihawt a ni bawk.

CYMA hruaitute chuan nimin khan Ministry of Home Affairs Secretary hnenah Governor office kaltlangin lehkha an thawn nghal a; an lehkhaah chuan Bangladesh aṭanga Zo hnahthlak ráltlânte dinhmun leh harsatna an tawh dante an tarlang a, ráltlânte Mizorama luh phalsak tur leh anmahni chhawmdawlna ngaihtuahsak turin an ngen a ni.