Ṭan la thar zel turin MJA member-te fuih

MJA General Headquarters chuan nimin chhun khan Aizawl Press Club-ah 2023 kum thar pualin MJA member-te tan thingpui inho a buatsaih. He hunah hian MJA president C Lalrambuatsaiha chuan, social media-ah thu dik leh dik lo a darh nasat avangin mi tam tak chuan chanchinbu leh TV news-te thu thar hriat nan an hmang leh tawh zawk tih sawiin, ṭan la thar zel turin MJA member-te a fuih.

Kum thar pual inkhawm hi MJA treasurer C Lalhmachhuana'n a kaihruai a; MJA President chuan, social media leh Covid-19 hripui léngin chanchinbu a titlahniam deuh tih sawiin, "Tho chhuak leh turin kan ṭan mar thar leh a ngai. Social media-ah thu dik leh dik lo a darh nasa a, thu dik leh dik lo thliar thiam a harsat ṭhin avangin mi tam tak chuan chanchinbu leh TV news ngei aṭanga thu thar hriat an duh leh tawh. Chuvangin, print media chawi nun leh dan tur kan ngaituah tlân a ngai a, chanchin thar lâk khawmah ṭan kan lâk thar a ṭul," a ti.

C Lalrambuatsaiha chuan, khawvela mi hlawhtlingte chu tluchhe fo tawh leh hlawhchham tawh ṭhinte an nih thu sawiin, "An ti hrâm hrâm a, hlawhtlinnain a ûm zui ṭhin. Beidawng duh lo, bei hrâm hrâmte an hlawhtling ṭhin," a ti a; chanchinbute pawh social media-in ei chhe deuh rih mah se, hnual phah nan hmang lo a, ṭan la thar zel turin MJA member-te a fuih a ni.

Kum thar puala thingpui inhonaah hian MJA member ṭhahnem tak an tel a, India rama working journalist upa bera chhàl leh MJA president hlui Lalbiakthanga Pachuau, kum 96-na hmang mek pawh a la tel thei a ni. MJA chuan kum 2023 chu MJA member-te tan kum ṭha, malsawmna thar dawn kum a nih theih nan leh tluang leh taima taka hna an thawh theih nan duhsakna a hlàn a ni.