Dy CM-in sorkar laipui a dàwr

Deputy chief minister Tawnluia, UDPA department enkawltu chuan nimin khan New Delhi-ah Ministry of Housing and Urban Affairs secretary Manoj Joshi a hmu a, UDPA department hmalaknate leh hmachhawpte a sawipui.

Sorkar thuchhuah tarlan danin, Tawnluia chuan, Swachh Bharat Mission hnuaiah khawpuite'n uluk zawka bawlhhlawh an sawngbawlna tur solid waste management centre chungchang sawiin, a hlawhtlin thuai theih nan hmalak thuai a ṭul thu MHUA Secretary a hrilh a; Special Assistance to States for Capital Expenditure part 6 Urban Reforms hnuaia project pawimawh pathum atana UDPA-in ruahmanna an thehluh chu bawhzui turin a ngen.

Tawnluia chuan, Asian Development Bank aṭanga loan hmuh tur, Aizawl Sustainable Urban Transport Project chu chak taka bawhzui a nih thu a sawi a; project kalpui a nih hunah MHUA puihna tam tak mamawh a nih dawn thu a sawi.

Manoj Joshi hian Deputy CM hnenah hian AMRUT, SBM(U), PMAY(HFA) leh scheme dangah state chanpual tur awm sa chu tihkhawtlai awm loa pek chhuah zel a nih tur thu a lo hrilh.

Deputy CM hi Delhi Mizoram House resident commissioner Amjad Tak, UDPA secretary Lalmalsawma Pachuau leh under secretary Zoramsiama Hmar ten an ṭawiawm a ni.