Minister-in mit leh beng hmanrua a sem

Social Welfare minister Lalrinawma chuan nimin khan SCERT Auditorium-ah rualbanlo, Person with Disabilities (PwD) zinga mit ṭha lo mi 25 leh beng ṭha lo mi 39 hnenah an mit leh beng puihna tur hmanrua/khàwl a sem.

Hmanrua an semte chu smartphone, tablet, bengdár leh universal braille kit-te a ni a; ADIP Distribution of Aids and Appliances NIEPMD, Chennai leh PwD Commissioner Office ṭangkawpin an ruahman a ni.

Minister Lalrinawma chuan, pianphunga rualbanlote chu sorkarin a ngai pawimawh tih sawiin, "An mamawh leh hamṭhatna chungchangah sorkarin a rang lama tihsak turin hma a la ṭhin," a ti.

Mi hlawhtling ni turin pianphunga mi vantlang chung lam nih kher a ngai lo tih sawiin Minister chuan, "Taksa pianhmangah mi dang kan pha kher lo a nih pawhin kan rilru put hmang a dik phawt chuan mi hlawhtling tak kan ni thei," a ti a; hmanraw thar an dawnte chu ṭangkai taka hmang turin a fuih a ni.