YMA hmalakna political party-te'n an thláwp

Bangladesh aṭanga himna zawnga Mizorama luh tum Zo hnahthlakte thlavang hauhna punkhawm nimina Central YMA-in a huaihawt chu an thlàwp thu political party hrang hrangin thuchhuah siamin an tarlang.

Rorel lai MNF party chuan, Bangladesh Zo hnahthlakte thlavâng hauhna punkhawmah tel vek turin an party mite an chah a, chuvang chuan, nimina Mizo Hnam Rûn hawn an tum pawh vawiinah hawn turin an sawn tih an puang a ni.

Bangladesh ráltlânte chhawmdawl nan chief minister Zoramthanga hmalaknain cheng nuai 30 pek a ni tawh nia tarlangin MNF chuan, "Buhfai, chawhmeh chi hrang hrang, damdawi, silpauline, mutbu, thlêng leh thosi lênte pawh pek an lo ni tawh," an ti a; ráltlânte tan Mizoram MP pahnih C Lalrosanga leh K Vanlalvena ten sorkar laipuiah kawng hrang hranga hma an lak thu leh Mizoram sorkarin theihtawp a chhuah mek thu an tarlang.

MNF chuan, "Pu Zoramthanga kaihhruai MNF sorkar chuan Zo hnahthlak hnam hrang hrangte politics buai avanga rilṭám leh chhuanchhama an awm a phal ngai dawn lo a, theihtawpin a chhawmdawl zel dawn a ni," an ti.

Mizoram Pradesh Congress Committee (MPCC) pawhin Central YMA hmalakna an thlàwp thu tarlangin, "Chittagong Hill Tracts, Bangladesh-a Zo hnahthlakte Bangladesh sipai leh Arakan Army helte vanga an in leh lo tlànsan a, dinhmun hlauhawm taka an awm mek hi a pawi kan ti," an ti a; ei leh in tur nei lo leh riahna tur mumal an neih loh vanga an vâkvai leh, Mizoram pana an kalna kawnga thihna hial an tâwk chu pawi an tih thu leh an tawrhpui thu an tarlang.

MPCC tarlan danin, CYMAin nimina punkhawm a huaihawtah MPCC vice president Lal Thanzara leh treasurer Zodintluanga Ralte bakah, MLA Lalrindika Ralte leh hruaitu dangte an tel. YMA hmalakna an thlàwpzia lantir nan nimina Congress Bhavan hawn an tum chu ṭhulhin, vawiinah an hawng dawn a ni.

PC party pawhin CYMA hmalakna ṭha an tih thu leh an thlàwp thu tarlangin, ráltlânte laka râwvâ taka an chêtna tàwpsan tur leh sahimna zawnga Mizorama luh tumte tuamhlâwm zawk turin sorkar laipui leh BSF-te an ngen a; CYMA-in sorkar laipui an karna chu a hlawhtlin theih nan thapui thawh turin Mizoram sorkar an ngen bawk.

PC party chuan, Mizoram sorkar chu CYMA rinchhan ringawt lo tura chahin, "Mahni state sorkar thuneihna leh thil tih theihna hmanga tlang taka kan unaute manganna leh harsatna sutkiansak hi a mawhphurhna liau liauah kan ngai," an ti.

MNF ṭhalaite pawhin CYMA hmalakna an thlàwp thu an tarlang bawk.