KHAWTHLIR

Sikul kai tan dawn
Mizorama sikulte chu Krismas leh kum thar chawlh chhung khâr a nih hnuah vawiin aṭangin hawn leh a ni dawn a, zirlaite'n sikul an kai leh ṭan tawh dawn.

Vaseikai police-in Opium an man
Lawngtlai district-a Vaseikai Police Station chuan January 8, Pathianni khan opium kg. 2 leh a neitua puh Morotso Chakma (39) s/o Laiche Chakma, Ludisora, Lawngtlai district nia inchhal an man. Vaseikai PS-ah thubuai ziah luh a ni a, a kaihhnawih dangte chhui zui a ni.

Officer tharte tan Foundation training
Mizoram Civil Service, Mizoram Finance and Account Service leh Mizoram Information Service-a lut tharte tan nimin khan Administrative Training Institute chuan an auditorium-ah foundation training a buatsaih ṭan. Training-ah hian MCS 20, MFAS pariat leh MIS pali an tel a, an vaiin mi 32 an ni.

Political party-ten Pisa hawng dawn
MNF, MPCC leh ZPM-te chuan nimin khan kumin chhung atan an pisa hawng turin programme siam mah se, Central YMA bultuma Bangladesh-a Zo hnahthlakte thlavang hauhna hun buatsaih a nih avangin an ṭhulh. Party pathumte hian vawiin hian an pisa-te an hawng ṭan dawn nia thudawn a ni.

INTACH workshop
Indian National Trust Art and Culture Hetitage (INTACH) leh INTACH Heritage Academy (IHA) chuan January 8, 2023 aṭang khan New Delhi-ah Capacity Building Workshop-XIII an buatsaih a, INTACH, Mizoram Chapter aṭangin Lalram Thanga, IFS (Rtd) leh JC Vanlalhmuaka te an tel. Workshop hi India rama INTACH chapter hrang hrang tana buatsaih a ni a, state hrang hrang aṭangin member 54 an tel a ni.