Kut inthlâk thubuai chhui zo

October 15, 2022 zana B Zalawma, Tuikual North kutthlak a nih chungchanga police-te'n first information report (FIR) an dawn chu chhui zawh a ni tawh.

Police hotute aṭanga Vanglaini thu dawn danin, thubuai chhui zawh a ni tawh a, an report chu court-ah an thehlut tawh. Court chuan thubuai a ngaihtuah zui dawn a, thutlukna a la siam dawn a ni.

B Zalawma kutthlaktu Daniel Sailo, Ramhlun Venglai chu October 17, 2022 tlai khan police-te'n an man a, thubuai siamsak a nihna chu bail theihna vek a nih angin thu an zawhfiah hnuah an chhuahtir leh nghal.

Tuikual North Local Council leh All NGO tarlan danin, Daniel Sailo hi Mizoram Civil Service (MCS) 2014 batch a ni a, Mizoram sorkarah under secretary ni mekin, Finance leh DMR a chang nia hriat a ni.