YouTube channel-in chî-âina a thlen ṭhin - MP C Lalrosanga

Indian Institute of Mass Communication (IIMC), North-Eastern Regional Campus chuan nimin khan Mizoram University Guest House seminar hall-ah 'Short Term Course for Media Persons from Sikkim' an buatsaih a, Lok Sabha MP C Lalrosanga'n a hawng. MP chuan, media lama zirna leh thiamna nei lote'n sum siam nan YouTube-ah channel an siam a, chu'ngte chuan mipui chî-âina a thlen ṭhin thu a sawi.

C Lalrosanga chuan, journalist-te tan taimâk lehzual leh dílchhût lehzual a ṭul tawh thu sawiin, "Journalist-te thu leh hla hi mipui ngaihdan leh sûkthlêk siamtu a nih fo avangin mawhphurhna lian tak in nei a, in thuchhuah ṭhinah inzir pah rengin, thu zawh tlak leh mi rin tlak nih reng tum ang che u," a ti.

Digital media hman thiama chhawr ṭangkai a pawimawh thu sawiin C Lalrosanga chuan, "Social media a ṭhang chak a, chutih rualin, social media-ah thuthang léng vel a tam bakah, rinthu sawi darh vak vak a tam hle. Hmun tinah media lama zirna leh thiamna nei lem lote'n sum siam nan YouTube channel an siam a, heng hian mipuiteah chî-âina leh rilru phìrna nasa takin a thlen a ni," a ti a; mipui hnenah thu dik leh rintlak thlen turin journalist dik takte'n ṭan an lâk nasat a ṭul thu a sawi.

Course hi January 13, 2023 thleng awh tur a ni a, Sikkim sorkar hnuaia Information & Public Relations department official pali leh Sikkim journalist 16 an rawn tel. Ni nga chhungin thupui hrang hrang zirho a ni ang.