Land Revenue & Settlement dept-in mawhphurhna kan nei sang - Revenue Minister

Land Revenue & Settlement (LRS) department chuan nimin khan an directorate conference hall-ah kum 2023 atana inhlanna leh infuihna hun an hmang a, khuallian LRS minister Lalruatkima chuan, LRS department-in mawhphurhna sang tak a neih thu a sawi.

Lalruatkima chuan, ram leilung chu Pathian pek a nih thu sawiin, "Chu ram enkawl chu sorkar mawhphurhna a ni. Hmasawnna eng pawh thawk dawn ila, leilunga innghat vek a ni a, ram a awm loh chuan hmasawnna ruhrel a bun ngheh theih loh. Heta ṭang hian LRS dept-in mawhphurhna kan nei sang hle a ni tih kan hre ṭheuh àwm e," a ti.

Revenue department chu chhung tin mamawh leh a tel loa awm theih lohna a nih thu sawiin Minister chuan, "Chhungkaw tin file/document kawltu department kan nih avangin file vawn ṭhat leh document vawn him chungchangah mawh nasa takin kan phur a ni," a ti a; thawktute chu an mawhphurhnaah ṭan la thar turin a fuih.

LRS Minister chuan, an department dawrtute chu naupang lam aiin upa lam - nu leh pate a tam zawk an nih ṭhin thu a sawi a, dawhtheihna leh hawihhàwmna nena lo dawr zel turin thawktute a chah.

Inkhawm hi LRS director K Laldingliana'n a kaihruai a; department hmalaknate an thlirho bakah, hmachhawpte a lem nen an inhrilhfiah a ni.