Bawlhhlawh sâwngbàwl chungchang sawiho

Lunglei district DC Kulothungan A kaihhruaiin nimin khan DC conference hall-ah sorkar official, khawtlang hruaitute leh tlawmngai pawl aiawhte'n Lunglei district-a bawlh-hlawh sâwngbàwl chungchanga hmalakna kal mek leh hmachhawpte an sawiho.

Ṭhutkhawma tarlan danin, bawlhhlawh sâwngbâwl leh faina lama hma la turin committee paruk din a ni a, chu'ngte chuan hma an la mek. Bawlhhlawh paih leh sâwngbâwl chungchanga Lunglei district-a complaint thehlut duh tan Control Room for Waste Management Grievance Redressal siam a ni a, phone number 7005968251/ 8974244504-ah hriattir theih a ni.

Bawlhhlawh sâwngbàwl (solid waste management) lama hmalakna hnuaiah model village atan khaw pathum - Diblibagh, Thénhlûm, Ṭhàizawl thlan a ni a, model town atan Tlabung thlan a ni. Model village leh model town-ahte hian sorkar, khawtlang hruaitute leh tlawmngai pawlte ṭangkawpin hmalakna kalpui mek a ni a; solid waste management centre siam mek a nih bakah, resource management centre sak mek a ni.

Ṭhutkhawmah hian hman khat daih sarâng (single use plastic) khapna khauh zawka kalpui dan tur te, bawlhhlawh paih lirthei mamawh belh chungchang te, mipui zirtirna kalpui dan tur te, zirna-in hrang hranga awareness campaign kalpui dan tur leh eco-club din dan turte sawiho a ni bawk.