PMJVK suma siam Tuidam leh Kawrthaha Artificial turf khelmual CM-in a hawng

Tuidam khelmuala phûl lem phah thar Laldenga Synthetic Turf Football Ground leh Kawrthah khelmuala phûl lem phah thar chu nimin khan chief minister Zoramthanga'n a hawng a; heng khelmualte hi PMJVK atanga sum hmuh hmanga siam a ni.

CM Zoramthanga chuan, Covid-19 lên laiin hmalakna tam tak a ṭhuanawp tih a sawi a, "Sorkar laipuiin a hmanna tur sum a rawn bituk sa hmangin tuna khelmual tihchangtlun hna hi ngawrh taka hmalak a ni," a ti.

Chief Minister chuan, hriselna tichhe thei zu leh ruihhlo lakah indopui puan a ngaih thu sawiin, "Khawvel huapa inkhel thiamte pawhin taksa fit leh hrisel an ngai pawimawh," a ti a; tumruhna leh inpekna nen an thil tumah an hlawhtlin ngei theih nan theihtawp chhuah turin naupang leh tleirawlte a fuih.

Sports & Youth Services minister Robert Romawia Royte pawhin thu sawiin, sorkar laipuiin zirna bakah infiamna a ngaih pawimawh thu a sawi a; New Education Policy pawhin zirlaite'n infiamna an uar tur a ni tih a tarlan thu a sawi.

Sports Minister chuan, khelmual enkawl zui danah khaw mipuite'n ṭangkai takin, dimdawi tak sia an hman a beisei thu a sawi rualin, "Khaw chhung mai bakah, a chhehvel khuate'n an chhawr ṭangkai theih nan management committee-te'n ruahmanna an siam thiam ka beisei," a ti.

Bialtu MLA Lalrindika Ralte pawhin thu sawiin, "Sorkar hi mipui ta a ni a, sorkar ta pawh mipui ta a nih avangin vawiina khelmual hawn pawh uluk taka enkawl chhunzawm kan mawh," a ti a; khelmual tharte chu hlawhtlinpui ngei turin ṭhalaite duhsakna a hlan a ni.

Mizoram Football Association aiawh leh Mamit District Football Association bakah khawtlang aiawh leh footballer Jeje Lalpekhlua-te'n thu an sawi bawk .