Tuivai luia lung/balu la tawh lo turin MPCB-in BR Goyal Infra. a hriattir

Mizoram Pollution Control Board (MPCB) chuan BR Goyal Infrastructure chu NE Khawdungsei bul Tuivai luia lung leh balu la tawh lo turin a hriattir.

MPCB hian January 9, Thawhṭanni khan BR Goyal Infrastructure hotute hnenah hriattirna thawnin, Tuivai luia lung leh balu an lâk ṭhin chu environmental clearance awm lo leh dan loa hmalakna a nih avangin titawp tur leh la tawh lo turin a hriattir a ni.

MPCB chuan, sorkar laipuiin January 15, 2016-a Environmental Impact Assessment Notification, 2006 a tihchhuah angin, lung lak a nih dawnin ram hectare 50 aia zímah state sorkar aṭang leh hectare 50 aia zauah sorkar laipui aṭangin environmental clearance lak hmasak a ṭul thu leh clearance la hmasa loin lung lak phal a nih loh thu an tarlang.

BR Goyal Infrastructure chu Tuivai luia lung leh balu an lâk ṭhin titawp tura MPCB-in a hriattir rual hian, chawlhkar hnih chhungin state sorkar aṭangin environmental clearance an hmu a nih chuan an lak chhunzawm theih tur thu an tarlang bawk.

NE Khawdungsei bul Tuivai luia lung leh balu lak tihtawp a nih theih nan hma la tur leh tihtawpna thupek chhuah turin Youth for Environment Justice, Mizoram pawhin January 4, 2023 khan Saitual DC/DM an lo ngen tawh a ni.