AR DIG thar Brig. Girish Upadhya

Brig. Girish Upadhya chuan Brig. Digvijay Singh hnen aṭangin Mizorama Assam Rifles 23 Sector Headquarters hotu ber, deputy inspector general (DIG) mawhphurhna a la ṭan a, hemi pual hian nimin khan Sector Hqrs-ah thuthar thehdarhtute an kâwm.

Assam Rifles DIG thar Brig. Girish Upadhya chuan, Mizoram tan theihtawp chhuahin hma an la dawn tih sawiin, an hmalakna leh hnathawhnaah Mizoram mipui nen ṭha taka an thawhho a beisei thu a sawi. Brig. Girish Upadhya hi Tawang, Arunachal Pradesh aṭanga rawn insawn a ni.

AR DIG kal chhuak Brig. Digvijay Singh chuan, Mizorama a awm chhungin mipui nen thawhhona ṭha tak an neih avangin a lawm thu leh hun kal zel turah pawh AR leh Mizoram mipuiin thawhhona ṭha tak an neih zel a beisei thu a sawi.

Brig. Digvijay Singh chuan, Mizoramah ruihhlo a hluar thu leh AR-te'n ruihhlo dona leh man chhuahnaah theihtawp an chhuah thu a sawi a; ruihhlo do kawngah AR-te'n chak zawka hma an lak zel dawn thu sawiin, AR-te thawhpui zel turin Mizoram mipui a sáwm.

Assam Rifles-te Aizawl khawpui laili aṭanga Zokhawsanga insawn chungchanga zawhna chhangin Brig. Digvijay Singh chuan, sawi theih a neih tawh loh thu a sawi a; chutih rualin, titihonaah AR hotute chuan, Zokhawsanga an hmun thar tur chu peihfel a la nih loh thu leh thil awm tur la awm lo tam tak a awm thu an sawi a ni.

Brig. Digvijay Singh hian nimin khan Mizoram a chhuahsan nghal a ni.