KHAWTHLIR

Vawiin Missionary Day
Vawiin January 11 hi kum 1894-a Mizorama missionary hmasa ber pahnih - Sap Upa (Rev. FW Savidge) leh Pu Buanga (Rev. JH Lorraine) te Mizorama an thlen champha, Missionary Day a ni a, Baptist kohhrante'n an lawm dawn. Presbyterian kohhrante chuan January 11 hi Mizoram Presbyterian Kohhran din champhaah an puang thung.

Larsap leh AR hotu
Assam Rifles 23 Sector DIG thar Brig. Girish Upadhya leh DIG kal chhuak Brig. Digvijay Singh te chuan nimin khan Governor Dr Hari Babu Kambhampati chu Raj Bhavan-ah an kâwm. Larsap chuan, India leh Myanmar inrîna an vên danah leh Mizorama ruihhlo an donaah lawmthu a hrilh a, an hna thar ve ve atan duhsakna a hlàn a ni.

INTACH hruaitu
INTACH, Mizoram Chapter convener P Rohmingthanga, IAS (Rtd.) chu a thih tâk avangin a aiawh turin co-convener ni lai Rin Sanga, IAS (Rtd.) chu INTACH Mizoram Chapter convener thar atana ruat a ni. Co-convener atan C Chawngkunga leh Prof. JV Hluna ruat an ni a, member secretary atan Lalramthanga, IFS (Rtd.) ruat a ni bawk.

AR-in Hindi zirtir
Assam Rifles chuan nimin khan World Hindi Day pualin Zokhawsang, Hnahlan leh Kàwlbêm khuaah zirlaite Hindi an zirtir a; zirlai eng emaw zat an tel.

Myanmar sipaiten Bomb hmangin bei
Myanmar sipaite chuan nimin tlai dar 3:30 vel khan Chin National Army (CNA) camp pakhat, Farkawn rama Ṭiau lui kài bul lawka awm chu jet fighter hmangin an bei a, bomb an thlak nia thu dawn a ni. Thu dawn danin, Myanmar sipaite'n bomb an thlâkna hmun hi Lava lui bul, CNA ho training-na field bulah a ni a, bomb vawi li thlâk mah se, thi leh hliam an awm lo.

Lirthei insú-ah thi
January 9, Thawhṭanni zan dar 7 vel khan Thingdawl Venglaiah Aizawl lam pana tlân truck leh Kolasib lam pana tlân scooter an insú.
Scooter khalhtu David-a, Damparengpui lam mi chu Kolasib District Hospital thlenpui a nih hnuah a hliam tuar loin Thawhṭanni zan dar 9 velah a thi.