Mizote lungrualzia a lang - Vanlalzawma
MNF vice president Vanlalzawma chuan, Bangladesh aṭanga Zo hnahthlâk ráltlânte thlavâng hauhna pun-khawm Central YMA-in a huaihawtah political party hrang hrangte'n an party pisa hawn tur ṭhulha an tel chu Mizote inlungrualzia tilangtu a nih thu a sawi.
MNF hian nimin khan kumin chhung atan an party pisa Mizo Hnam Rûn an hawng a; thu sawitu Vanlalzawma chuan, "Party hrang hrangin CYMA hmalakna thláwpa mahni party pisa hawn tur pawh khâr hiala hma kan la thei kha Mizote kan lungrualzia lanna a ni. Kan unaute tan thâ thlah loin kan pên zel dawn," a ti.
Vanlalzawma chuan, "Kan hnam martarte kha an huaisen vang leh an châk vang a ni lo a, he ram an hmangaih vanga nun hlan an ni," a ti a; kuminah uar zawk leh ngawrh zawka campaign tum a nih thu sawiin, lungrual leh pheikhai rual taka kal zel turin an party mite a chah.
MNF adviser Lalruatkima, minister pawhin thu sawiin, Bangladesh aṭanga Mizorama ráltlânte buaipui chu thil buaithlak tak a nih avangin politics khelhna atan hman chi a nih loh thu a sawi a, "A chhan chu UN High Commissioner for Refugees Convention 1951 leh hemi behchhana Protocol 1967 a siamah India hi signatory ram zingah a tel ve loh avangin hmalak a har zual a ni," a ti.
Lalruatkima chuan, Zo hnahthlak mangang taka Mizorama tlân khâwmte chu an khawngaihthlak hle tih sawiin, "Kan Mizopuite tawrhna leh manganna hi sorkar ang pawhin kan hriatpui a, hrehawm pawh kan ti. Mizoram sorkar chuan theihtawp kan chhuah a, kan chhuah zel dawn bawk," a ti a; duh ang leh ruahman ang diak diaka thil a kal chak theih loh avangin pawi a tih thu a sawi.
MNF Adviser chuan, "Kan chipuite manganga awm hi kan phal lo, a ṭul a nih chuan central sorkar pawh kan nawr zel dawn. Kan hnampui an nih miau avangin Mizo tlawmngaihna leh ṭhian chhan thih ngam rilru kha Pu Zoramthanga kaihhruai hian a kalpui zel dawn a, a ṭul a, a rem a nih chuan Bangladesh sorkar pawh kan la dawr ang," a ti.