ZPM hi beidawng tawhte'n beiseina thar an nghahna awm chhun a ni - Lalduhoma

ZPM leader Lalduhoma chuan, ZPM chu beidawng tawhte'n beiseina thar an nghahna awm chhun a nih thu leh, inthlan atana an campaign lai aṭangin eirûkna leh hlemhlêtna (corruption) an do nghal tur thu a sawi.

ZPM party hian nimin khan kum 2023 atan an party pisa an hawng ṭan a, hawnna inkhawmah Lalduhoma'n thu a sawi a, ZPM zawm thar mi 189 a lawm luh thu ZPM thuchhuah chuan a tarlang.

Lalduhoma chuan, Mizoram leh sorkar tichhe ṭhintu chu ruling party an nih zel thu sawiin, a ṭha zawnga hma hruaitu tur ruling party an awm a ṭul thu a sawi a, "Ruling party apiang hi unit leh village council aṭanga a lu ber thlengin an hna a chhe tlangpui zel. Tun hnaiah pawh Bualpui Ng-a CHC sak chu YLA-in an chhu chhia a ni. ZPM hi Pathian leh mipui zarah kan sorkar ve a nih chuan chutiang chu kan ni ve thiang lo, kan danglam tur a ni," a ti.

ZPM Leader chuan, inthlan kum a nih avangin party tinin campaign an ṭan tawh dawn tih sawiin, "Tun aṭang hian corruption kan do nghal tur a ni a, kan campaign dan pawh a thianghlim tur a ni. Mi hausa kan hlau tur a ni lo a, an lakah kan zâm tur a ni hek lo," a ti a, MPF leh kohhrante mit tikhama awm tur a nih loh thu a sawi.

Tunlaiin media lama inbeih duh dan leh ṭawngkam hman duh dan a bawlhhlawh tawh hle tih sawiin Lalduhoma chuan, "Kan Politics hi a tenawm ta khawp mai. Keini chuan party dang leh an hruaitute kan zah tur a ni a, ṭawngkam hawihháwm kan hmang hrâm hrâm tur a ni," a ti a; tui tifímtu nih tum turin an mite a chah.

Lalduhoma chuan, kumin kum tàwp lamah inthlanpui a awm dawn tih sawiin, "Semi final kan paltlang tawh a, MNF nen final kan khel dawn," a ti a; party mala an sorkar ngei theih nan ṭang tura fuihin, "Party dangte aiin kan taimain kan thawk rim tur a ni a, kan mimal eizawnna ṭheuhah pawh entawn tlak nih tum ang u," a ti.

ZPM Leader hian tunlaiin Mizoram chhung leh páwna Mizote zingah politics-a harh tharna a thlen mek thu te, mipui mimir, a bikin ṭhalai zingah ram veina, corruption huatna, sorkar ṭha zawk duhna a len thu te, Uniform Civil Code (UCC) chungchangah Citizenship Amendment Bill pass ang mai maia Mizo mipui phatsan tawh lo tura CM Zoramthanga leh MP-te a ngen thu te, UCC chu kohhran leh pawlte nen nawrho a ngaih thu te, Bangladesh aṭanga Zo hnahthlak ráltlânte chungchanga Central YMA hmalakna an thlâwp thute a sawi bawk.