Congress-ah eirûkna a awm thiang lo - MPCC President

Mizoram Pradesh Congress Committee (MPCC) chuan nimin khan kum 2023 atan Congress Bhavan an hawng a; hawnna inkhawmah MPCC president Lalsawta chuan, Congress party-ah eirûkna a awm thiàn loh thu a sawi.

Lalsawta chuan, Central YMA leh Synod-in eirukna do an puang tawh tih sawiin, "Mi tam ber kan telna pawlte'n an duh ang ngeiin Congress hian corruption kan do dawn. Congress-ah corruption a awm dawn lo a, awm pawh a awm thiang lo. Mizoram hi mi taima leh thawk rimte dinchhuahna leh hlawhtlinna ramah kan siam dawn a ni," a ti.

MPCC President chuan, central-ah Congress an sorkar lohin Mizorama an sorkarna a dâl lo tih sawiin, "Central-a Congress an sorkar loh avangin Mizoramah kan sorkar lo tur anga sawite hian Congress an hre chiang lo. Dr Lal Thanhawla hoin central-a Congress an sorkar loh pawhin kan sorkar fo," a ti a; Mizoramah Congress an sorkar ngei tur thu a sawi.

MLA inthlanpui kumina awm turah sum neite an lungmuang a, inthlan an cho nia sawiin Lalsawta chuan, "Keini chuan sum rin tur kan nei ve lo a, Pathian rin tur kan nei. Sum nei fel tak tak an awm, mahse, sum an neih dan pawh hriat chian lohte sum ngah vang ngawta kan ram rorelna sang bera an ṭhu tur kan ngaingam lo," a ti.

Congress party President chuan, an party chu mi thianghlim leh fel awm khawm an ni lo tih sawiin, "Duh dan thar, tih dan thar leh beiseina thar nen kan kal dawn. Taima taka kan thawh zel chuan sorkar ringawt ni loin, sorkar ṭha siam kan duh a, kan siam ngei ang," a ti a; candidate-te phur tirit lo zawnga che turin an party mite a chah.

Sorkarna an siam chuan kawlphetha siam an ngai pawimawh dawn tih sawiin Lalsawta chuan, "Ram hmasawn nan power mamawhna a sang tial tial. Congress kan sorkar a nih chuan power siam chhuah belh kan ngai pawimawh dawn. Ram ṭhenawmte nen ram dan anga insumdawn tawnna mumal takin kan siam bawk ang," a ti.

Inkhawmah hian MPCC President hian Science & Technology-a chief scientific officer (rtd) Dr RK Lallianthanga an party-ah a lawm lut.