Retheihna laka zalenna kan neih nan BJP sorkar Mizoramin a mamawh - Hmuaka

BJP, Mizoram Pradesh chuan nimin khan an party pisa hawnna inkhawm leh kum 2023 atana inhlanna hun an hmang a; BJP president Vanlalhmuaka chuan, Mizoramin retheihna laka zalenna a neihna turin BJP a sorkar a ngai niin a sawi.

Vanlalhmuaka chuan, prime minister Narendra Modi sorkar hnuah chauh India ramah retheihna laka zalenna a thleng thei niin a sawi a, "Mizoramah pawh retheihna lak aṭanga khaichhuah hi BJP din chhan leh a tum a ni a, Mizoramah sorkar laite'n mirethei chan ái an tihchingpen ṭhin avangin retheihna lak aṭanga khaichhuaha zalenna kan la hmu ve thei lo. Retheihna lak aṭanga zalenna kan neihna turin BJP sorkarna Mizoramin a mamawh a ni," a ti.

Mahni hamṭhatna dahṭha a, Mizoram leh hnam tan hna an thawh dan tur ngaihtuahna pui bera nei tura an party mite chahin Vanlalhmuaka chuan, "BJP kan din chhan leh kan awm chhan pakhat chu - Isua Krista hnathawh leh ngaih pawimawh chhunzawm a ni," a ti a; mirethei, ngaihsaktu nei lo chanhai leh hmeithaite'n an chanvo an chan ngei theih nan Mizoramah BJP an awm niin a sawi.

BJP President chuan, kumina MLA inthlanpui awm turah retheihna sal aṭanga Mizoram a chhuah theih nan leh corruption hnungkhirh a, ram hmasawnna a awm theih nan BJP sorkar siam turin theihtawp chhuah a ṭul thu a sawi a, "BJP hi Mizoramah kan sorkar a nih chuan loneitute thlai thar hralhna tur ngaih pawimawh a ni dawn. Kan ramah a lem ni loin, Krista hmel dik tak a lan theihna turin hma kan la dawn a ni," a ti.