Governor-in bank hotute a kâwm

Governor Hari Babu Kambhampati chuan nimin khan Raj Bhavan-ah State Bank of India (SBI) leh Regional Rural Banks (RRB) hotute a kâwm a; an hun âwlah khawlai fang a, hawker, dawr tê leh chawhmeh zuartute tlawh kual a, bank aṭanga sm an pûk theih chungchang hrilhfiah ṭhin turin bank hnathawkte a chah.

Dr Hari Babu Kambhampati chuan, tun hnaia bank-te hmasawnna chu lawmawm a tih thu sawiin, "Sumdawng tênau zawk - dawr tê neia khawlaia ṭhu te, chawhmeh zuarte leh a dangte'n loan an lak theihna tura ṭan lak a ngai a, in hun âwlah khawlai fang kualin, bank aṭanga an sumdawnna pui tura sum an pûk theih chungchangte hrilhfiah ṭhin ang che u," a ti.

Sumdawng tênau zawkte'n Mudra Shishu loan, Rs 50,000 thleng an pûk theih te, Mudra Kishor loan Rs 50,000 - 10,00,000 an pûk theihte an hriat chian a ṭul sawiin Larsap chuan, PMJDY, PMJJBY, PMSBY leh scheme dangah tam zawk ziak lut tura ṭan la turin a chah bawk.

SBI regional manager Rakesh Kumar Ravi chuan, hmasawnna ṭhenkhat leh scheme hrang hranga inziak lut tihpun kawngah ṭan lak an tum thu a sawi a; Mamit district chu aspirational district a nih avangin bank lama mamawh hrang hrangte thuam chak a nih tur leh Mizoram hmun hrang hrangah branch hawn belh tum a nih thu a sawi bawk.

Mizoram Rural Bank chairman Jaya Chandra chuan, MRB chu India hmarchhak bialah internet banking facility nei hmasa ber a nih thu te, Mizorama MRB branch-te leh customer service point 500-ahte internet banking tih theih tawh a nih thu te, branch hawn belh an tum thute a sawi.

Inkawmhonaah hian RRB general manager V Siva Kumar, SBI Corporate Center, Mumbai aiawh leh SBI leh MRB hotute an tel a, an hmalakna leh hmachhawpte an sawi a ni.