AIR, Aizawlin chhûn lamah chanchin thar an puang ṭan

All India Radio, Aizawl Station chuan nimin aṭang khan chhun lamah chanchin thar (midday news bulletin) an puang ṭan a, Information & Public Relation minister Lalruatkima'n a hawng.

AIR, Aizawl Station chhun lam chanchin thar hi ni tin chawhnu dar 2:30-ah puan a ni dawn a, Prasarbharati Apps, FM, MW channel leh satellite mode-in DTH-ah pek chhuah ṭhin a ni ang.

Lalruatkima chuan, AIR chu khawvela radio network lian ber leh ṭawng hrang hranga thu puang darh tam ber a nih thu sawiin, "India ram 92% a tuam chhuak tawh a, kan ram mipui 99.19% hnen a thleng tawh. AIR, Aizawlin programme a tihchhuahte hi Mizoram mipui bakah, state danga Mizote leh Bangladesh leh Myanmar rama Zo hnahthlakte'n an ṭangkaipui hle a ni," a ti a; Zo hnahthlakte insuih khawmna hmanraw pawimawh a nih thu a sawi.

Social media khawvel a ni mek tih sawiin Lalruatkima chuan, "Thuthang chhiar tur leh hriat tur awm reng karah thu belhchian dâwl lo tam takin a pawlh ve reng a, mipuite'n thu chiang an lâkna ber chu chanchin thar puangtu te, AIR leh Doordarshan news-te hi a la ni reng a ni," a ti.

AIR chhun lam chanchin thar puan ṭan hawnnaa khualzahawm Mangjangam Touthang, DDK Aizawl director (News) chuan, Mizoram chanchin ṭha tak tak ziak a, hma la zel turin journalist-te a chah a; journalism leh mass communication chu eizawnna ṭha tak a nih thu sawiin, Mizo ṭhalaite'n zir intihhmuh se a duh thu a sawi.