Minister-in kumpuan hawng

Minister Lalrinawma chuan nimin khan a bial, Ngentiang community hall-ah YMA, Ngentiang Branch kumpuan 'Khawtlang nun chawisan' a hawng.

Minister hian kumpuan tihhlawhtlin a nih theih nan mahni hmazâwn ṭheuhah ṭan la sauh sauh turin khawtlang mipui a ngen a; "Zirna leh hriselna hi hmasawnna bulthut a ni tih kan hriatreng a pawimawh," a ti.

Taksa hrisel tak kan neih theih nan, nunkawng thianghlim kan zawh thiam a ṭul hle tih sawiin Lalrinawma chuan, "Ram, chhungkua leh khawtlang tana thawkchhuaktu kan nih theih nan zirna leh hriatna lama kan intahhriam sauh sauh pawh a pawimawh," a ti a, Ngentiang mipuite chu an kumpuan tihlawhtling tura mahni hmazawn ṭheuha bei sauh sauh turin a ngen.

Lalrinawma chuan khua leh tui ṭha ni tura inpekna, vantlang thilte mahni ta ang taka enkawl thiamnate, nungcha leh ramngaw humhalh ṭhatte, Zonunzemawi rinawmna, tlawm-ngaihna, leh aia upa zahnate chawinun thiam zelna te a pawimawh hle dawn tih a sawi a, "Kan hnam ziarang leh ṭawngte khawiahmah zahpui loa, a chawi lartu nih zel te a ṭha hle," a ti.

Kumpuan hawnnaah hian 'Khawtlang nun chawisan leh zirna' tih leh 'Khawtlang nun chawisan leh eizawnna' tih thupui zirho a ni.