Sorkar ram enkawla venghimtu tur state leh district level-ah din a ni

Mizoram sorkar chuan tun hnai khan The Mizoram Government Land Pooling and Management Scheme hnuaiah sorkar ramte enkawla venghimtu tur a din a; state level-ah State Level Authority leh district level-ah District Level Authority a din.

GAD notification tihchhuaha tarlan danin, State Level Authori­ty-ah chairman chu Chief Secretary a ni a, vice chairman chu GAD Secretary niin, member secretary chu GAD Additional/Joint Secretary a ni. Member-ah Home, Revenue, Law & Judicial, Finance leh Planning department-a secretary-te an tel. Authority hian state sorkar hnuaia department dang secretary emaw, officer-te thawhpui turin an thlang thei.

District Level Authority-ah chuan chairman chu district bawrhsap an ni a, vice chairman chu additional DC niin, member secretary chu SDO (Sadar) an ni. Member-te chu - district superinten­dent of police, DRDA project director, SO/ASO, PWD/PHE/P&E department-a superintending engineer / executive engineer, district treasury officer, office-a hotu ber leh SDO (Civil)-te an ni.

 State Level Authority mawhphurhna

•    Sorkar ram zawng zawng an enkawl ang a, ram enkawl dan tur te, tih­hma­sawn dan tur leh venhim dan turte a ṭul ang zelin an ruahman ang.

•    State Level Authority hi GAD hnuaia din Estate Management Cell-te'n an thláwp ang.

•    Estate Management Cell hian authority-in ṭul a tih angin thawktu a nei ang a; sorkar ram, building, quarters leh ro lâk sawn thei lohte fel takin an vawng ang.

 District Level Authority mawhphurhna

•    District Level Authority hi DC pisa in a din Estate Management Cell-te'n an thláwp ang. A nihphung, thawktu leh ṭul dangte chu authority thu anga tih tur a ni.

•    Authority hian sorkar ram, building leh lak sawn theih loh rote an district chhunga mi an vawng ang.

•    An inhmukhawm ṭhin ang a, chutah chuan sorkar ram dinhmun thlirin, a hman dan tur an sawiho ang.

•    Khawih chêt theih loh sorkar rote list fel tak leh a hlut zawng an nei tur a ni. An huam chhunga sorkar ram record an vawng ṭha ang a, LSC zawng zawng pawh an vawng ṭha ang.

•    Sorkar ram luah emaw, hman lailawk emaw man zat tur an bituk ang.