Mizoram sorkarin kumin chhungin cheng vbc. 1,119.2 a pûk tawh

Mizoram sorkar chuan financial year kal mek 2022-23 chhungin hmun hrang hrang aṭangin cheng vbc. 1,119.2 a pûk tawh.

Vanglaini-in RTI Act hmanga a zawhna Finance department-in a chhàn danin, Mizoram sorkarin kum 2022-23 chhungin hmun panga aṭangin sum a pûk tawh a; a puk tamna ber chu Open Market Borrowing (OMB) hmangin a ni a, OBM hmangin cheng vbc. 850 a pûk tawh a ni.

Sum pûk belh a nih dawn leh dawn loh zawhna chu Finance department chuan, "Kumin sorkar kum chhung hian kan pûk bak pawh pûk a la ngai tura rin a ni," tiin an chháng.

Mizoram sorkar chuan Asian Development Bank (ADB) aṭanga cheng vbc. 1,000 pûk turin hma a la mek a, tihfel ngaite tihfel thawkhat tawh a nih thu sorkar hotute chuan an sawi. ADB loan pûk theih a nih chuan sorkar laipuiin cheng vbc. 720 an rûl ang a, Mizoram sorkar rulh tur chu cheng vbc. 280 a ni.

Hetih lai hian, Mizoram sorkar chuan kum 2022-23 chhungin November 2022 thleng khan Share of Central Taxes aṭangin cheng vbc. 2,755.58 a hmu tawh a, Post Devolution Revenue Deficit Grant aṭangin cheng 1,076.66 a dawng tawh bawk.