Minister/MLA-te'n ráltlânte an tlawh

Minister pahnih - Lalruatkima leh TJ Lalnuntluanga, MLA K Laldawngliana leh MNF vice president Vanlalzawma te chuan nimin khan Bangladesh aṭanga Parva-III, Lawngtlai district-a Zo hnahthlak ráltlânte awmna an tlawh a; an inpui an thleng tih hriaa thlamuang taka awm turin ráltlânte an thlamuan.

Sorkar thuchhuah tarlan danin, minister leh MLA-te hi chief minister Zoramthanga'n a tirh anga kal an ni a; Parva-III khuaa Bangladesh aṭanga Zo hnahthlak ráltlânte chu vantlang inkhawm an neihpui a, hmalak zel dan tur an sawipui bakah, khawtlang hruaitute'n mamawh an thlente an ngaithla a ni.

Minister-te chuan, ráltlânte chu sorkarin a ṭul anga a ngaihtuah zel tur thu hrilhin, an thil hmuh dan leh a ṭul angte chu sorkar hotu te, a bik takin Chief Minister an sawipui tur thu leh a rang thei ang bera ruahmanna siam zel a nih tur thu an sawi a; an inpui Mizoram an thleng tih hria a, thlamuang taka awm turin ráltlântean chah.

Ráltlânte chu harsatna an neihah khawtlang hruaitute leh tlawmngai pawlte hriattir zel tur leh, a ṭul angin Chawngte SDO (Civil) hnenah pawh an harsatna leh an mamawh thlen zel turin an chah bawk.

Minister-te hian ráltlânte tana hmalakna kal mek, PHE department-in tui khâwlna an buatsaih leh thil dangte an enfiah nghal a ni.