Missionary Day lawm a ni

Nimin kha Mizorama missionary hmasa pahnih - Sap Upa (FW Savidge) leh Pu Buanga (JH Lorraine) ten January 11, 1894-a Mizoram leilung an rah champha, Missionary Day vawi 129-na a ni a, Baptist Church of Mizoram (BCM) kohhrante'n uar takin an lâwm.

Missionary Day-ah hian zing karah Sap Upa leh Pu Buanga te inbenbelna hmun, MacDonald Hill, Zarkawtah chuan Zarkawt Presbyterian Kohhran buatsaihin a duh apiang tel theih turin inkhawm buatsaih a ni a, inkhawm bànah thingpui ruai an kîlho a ni.

BCM tualchhung kohhran hrang hrangte chuan awmní khamin Missionary Day an lawm a, chawhmaah lawmthu sawi inkhawm neiin, thupui chu 'Chanchin ṭha hi hril rawh u' tih a ni a, chawhnu lamah kohhran ṭhenkhat chu an inkhawm laiin, ṭhenkhat chu an zaikhawm thung. Kohhran eng emaw zat chuan tlaiah Missionary Day lawmna ruai an ṭheh.

Mizoram Presbyterian Kohhran chuan kum eng emaw zat January 11-ah Chanchin Ṭha Thlen Ni an hman hnuah, Synod Inkhawmpui thutlukna angin Rev. William Williams-a'n Tlawng lui Kutbûl lui chhuah a thlen ní, March 15, 1891 chu Chanchin Ṭha Thlen Ni atan an pawm ta zawk a; kum 2014 aṭangin an hmang ṭan.

Presbyterian kohhran hian Chanchin Ṭha Thlen Ni atan January 11 an hman loh hnuah, kum 2018 vel aṭang khan January 11 chu an kohhran din ni atan an hmang leh ta a ni.