Sorkar laipuiin January, 2023 atangin a thlâwnin buhfai a sem dawn

Sorkar laipui thupek angin India ram pumah National Food Security Act (NFSA)-a inziak lutte hnenah tun January thla aṭangin a thlàwnin ration buhfai sem a ni dawn a, kumin chhung zawng sem tur a ni. Mizoram sorkar pawhin a thlàwna buhfai sem nghal turin hriattirna a tichhuak tawh.

Ration buhfai a thlàwna sem tur chungchangah hian sorkar laipuia Ministry of Consumer Affairs, Food and Public Distribution hnuaia Department of Food and Public Distribution chuan December 30, 2022 khan hriattirna (notification) a chhuah a; chumi ang chuan NFSA 2013 Section 3 hnuaia hamṭhatna dawngtute hnenah a thlâwnin buhfai sem tur a ni.

A thlàwna buhfai sem avangin Mizoram sorkarin sum a sèn belh tur a awm leh awm loh chungchanga Vanglaini zawhna chhángin FCSCA minister K Lalrinliana chuan, sorkar laipuiin subsidy a pek tur zat an la hriat chian loh thu a sawi a, "Central-in a subsidise tur zat kan la hre chiang lo a, retailer margin money tih velte a awm ve a, eng emaw chen chu a nghawng ve mai thei," a ti.

K Lalrinliana chuan, a thlàwna buhfai sem chu sorkar laipui ruahman a nih thu sawiin, "Central hian ngaihtuahna an hmang ṭha ka ti a, Covid-19 lên lai pawhin a thlàwnin buhfai sem a lo ni tawh," a ti a; sorkar laipui ruahmanna chu ṭha a tih thu a sawi.

Mizoram sorkara Food, Civil Supplies & Consumer Affairs (FCSCA) department director Dr Andrew H Vanlaldika chuan January 9, 2023 khan hriattirna tichhuakin, a thlâwna buhfai sem tur chungchangah district civil supply officer (DCSO) tin huam chhunga fair price shop dealer (retailer) tinah hriattirna chiang taka pek a nih tawh thu a tarlang.
FCSCA Director chuan, buhfai a thlàwna sem tur chu man neia sem a nih lohna turin village/local council-te

hriattira thawhpui tur leh uluk taka vil turin DCSO-te a chah a, "Ration hi online-a sem chhunzawm rur niin, e-PoS leh digital weighing scale (DWS) an hmang ngei tur a ni a, central sorkar duh dan angin e-PoS print receipt hi ration late hnenah pek ngei tur a ni bawk," a ti.

January 5, 2023-a ṭhutkhawmnaa an rêl angin, retailer margin tur chu FCSCA Directorate aṭangin DCSO tinah LOC-a pek chhuah a ni dawn a, DCSO-te'n retailer-ah an sem dawn a ni.

Ration a thlâwna sem a nih tur thu hi sorkar laipuia Food and Public Distribution director (PD) Vivek Shukla chuan December 28, 2022 khan state leh union territory tin Supply department secretary-te hnenah a hriattir tawh. Free ration hi kumin January 1 aṭanga December 31 chhung atan a ni a, a thlâwna sem a nih theihna tura sum sensote chu sorkar laipui tum tur a ni.

A thlâwna ration sem turah hian buhfai bakah, chaw atana rin chi thil dang - wheat leh coarse grain an tih - buhtun, vaimim leh thil dangte a tel bawk.