Myanmar jet fighter bomb Mizoramah a tla; tihchhiat lian tham a neih hriat a ni lo

Myanmar sipaite'n January 10, Thawhlehni tlai dar 3:30 vela jet fighter leh bomb hmanga Myanmar leh Mizoram inrìna bula Chin National Front (CNF/CNA) camp an beihnaah bomb pakhat chu Mizoram chhungah tla mahse thil tihchhiat lian tham a awm lo a; Myanmar lamah mi panga an thi thung.

YMA, Farkawn Branch secretary Lalchhuankima chuan Vanglaini palai zawhna chhángin, Myanmar sipaite jet fighter hmanga an chêtnaa bomb pakhat, Mizoram chhunga tla chu Farkawn khua aṭanga km. 8 vela hla, Ṭiau lui kamah a nih thu a sawi a, "Balu phurtu motor pakhat darthlalang a tichhia tih loh chu thil tihchhiat lian tham a awm lo," a ti.

Lalchhuankima chuan, Myanmar sipaite'n CNA camp an beih thâwm chu Farkawn aṭang pawhin a na hle tih sawiin, "Ṭêk tla ang mai a ni a, Farkawn pawh a nghawr na hle," a ti a; Farkawn ram chhunga bomb a tlak hnuah pawh hun eng emaw ti chhûng chu sipai jet fighter thâwm hriat tur a awm tih a sawi.

Tahan-a Mizo media, The Tahan Post tarlan danin, Myanmar sipaite'n CNF/CNA camp an beih tak chu Mizoram ramri aṭanga hnai tê, Thantlang huam chhunga Victoria camp a ni a, jet fighter pali hmanga beiin, ṭum nga aia tlem lo an bei a ni.

He inbeihnaah hian CNF sipai panga - Chin mi vek an thi a, an zinga pahnih chu hmeichhia an ni a; mitthite chu - Salai Van Ro Piang, Salai Duh Tin, Mai Ngun Hlei Par, Mai Sui Len Par leh Salai Kil Mang te an ni.

Myammar sipaite chuan nimin tlai dar 4 velah khan jet fighter leh bomb hmangin Ṭiau lui kam, an ram chhunga CNA camp an bei leh a; Farkawn khawtlang hruaitute chuan, sipaite'n CNA camp an beih thâwm chu a rei lo a, bomb puak rî vawi khat chiah an hriat theih thu an sawi.

Mizoram hnai taka awm CNA camp hi November, 2022 khan Myanmar siaite hian an lo bei tawh bawk a ni.