Kum 2022 chhungin Aizawl Sahuanah dan loa ramsa tawlh rûk 261 dah a ni

Aizawl Zoological Park (Sahuan)-ah kum 2022 chhung khan dan loa ramsa tawlh rûk, thuneitute'n an man 261 dah a ni.

Deputy conservator of forest (Wildlife) Lalnunzira chuan Vanglaini palai zawhna chhangin, kum 2022 chhung khan ram dang aṭanga Mizoram kaltlanga ramsa tawlh rûk tur man zinga 261 chu Aizawl Sahuanah dah an nih thu a sawi a; ramsa 261 chu chi hrang (species) 49 a ni.

DCF chuan, Mizo-ramah ramsa tawlh rûkte daha enkawlna tur bik Animal Rescue & Reha-bilitation Centre din a nih theih nan layout plan an buaipui a, Chief Wildlife Warden pawmpui turin nimin khan thehluh hman an inbeisei tih a sawi a, "Aizawl Sahuan chhungah leh Aizawl Sahuan hnuaia awm turin Champhaiah Animal Rescue & Rehabilitation Centre din tumin kan ruahman. Layout plan zawhah master plan kan siam leh ang a, Central Zoo Authority (CZA) pawmpui turin kan thawn ang," a ti.

Ramsa tawlh rûk mante Aizawl Sahuana dah tura hmunhma ruahman sa a awm loh avangin harsatna an tawh thu sawiin DCF chuan, "Ramsate hi sahuana dah tawpin a fel ringawt lo a, sahuanah ramsa dang eng emaw zat a awm sa tawh avangin an awmna tur hmun ruak zawna siam a ngai a, an ei tur pawh ramsa chaw supply-tute'n an kêp vek a ngaih avangin sum tam tak sèn belh a ngai," a ti a; ramsa tawlhruk chu a tam tham avang leh CZA aṭanga sum an hmuh mumal tawh loh avangin enkawl a hautak thu a sawi.

Lalnunzira chuan, Aizawl Sahuan chu vety doctor pakhatin chawlhkar khatah vawi hnih a tlawh ṭhin thu sawiin, "Tun hma chuan deputation-in vety doctor leh VFA pakhat ve ve an awm ṭhin a, AH&Vety department an indaih lo nen, tunah chuan kar khatah vawi hnih chiah min rawn tlawh a, sahuanah ramsa eng emaw zat an awm avangin kan duhkhawp lo hle a ni," a ti.