Ṭhaizawl khuaa refugee camp-ah Kohhran pawl mal din tihtàwp rêl

Lunglei district-a thuneitu hrang hrangte January 10, Thawhlehnia ṭhukhawm chuan, Ṭhaizawl khuaa Myanmar ráltlânte awmna (camp)-a kohhran malin biak-in leh fellowship an din chu tihtawp an rêl.

January 10, 2023-a Lunglei district thuneitute ṭhukhawm hian Lunglei district-a Myanmar ráltlân awm mekte chungchang ngaihtuahin, raltlânte enkawl dan tur leh an hmalam hun atana inbuatsaih dan tur an sawiho a; Ṭhaizawl refugee camp bika kohhran malin biak-in leh fellowship an din chu tihtawp ni se, tiin an rél a ni.

Ṭhutkhawmah hian, hmun danga Myanmar ráltlân ṭhenkhatin anmahni duh dan dana Ṭhaizawl refugee camp an pan ṭhin thu tarlan niin, ṭha lo an tih thu an sawi a; Ṭhaizawla Local Refugee Board hriatpuina lo chuan tu mah mahni thua luh phal loh ni se, an ti.

Refugee camp-a ṭanpuina leh thilpek pe turte tan Ṭhaizawl Refugee Board hnenah hriattir ṭhin ni se, an ti a; ráltlânte'n an lirthei, Kebo bike an kawl chu camp páwn lama tlân chhuah phal loh ni se, tia an rèl rualin, ṭul bik thilah chuan Ṭhaizawl Refugee Board hriatpuinaa tlan chhuah phalsak turin an rêl a ni.

Ṭhutkhawmah hian, Ṭhaizawl camp chu ráltlânte awm khawm tam berna niin, mi 730 chuang an awm mek a, a tâwt tawh avangin Pûkpui lama mimal inphalte ram chu ráltlânte dahna atan a rem leh rem loh enfiah an rél a; ṭhál thleng chho mekah ráltlânte hnena tui pek dan tur te, eibàr an zawn theih dan tur te, an inrêlbàwlna chungchangte chu Lunglei District Refugee Committee ngaihtuah atan an dah thung.

Ṭhutkhawm hi Lunglei additional DC Donny Lalruat-sanga'n a kaihruai a, sorkar department aiawh te, Ṭhaizawl Refugee Committee leh Ṭhaizawl Refugee Board hruaitute an tel a ni.